កីឡាករប្រដាល់កម្ពុជា ឡៅ ចន្ទ្រា នឹងត្រូវប៉ះកីឡាករអ៊ីរ៉ង់ Ahmadnezda នៅសង្វៀនអ្នកតស៊ូគុនខ្មែគោជល់ប៉ុស្តិ៍ CNC។ ប៉ុន្តែអ្វីដែលគួរឲ្យកត់សម្គាល់នោះគឺថា អ្នកប្រដាល់កម្ពុជាកំពុងតែទទួលរងសម្ពាធយ៉ាងខ្លាំងពីសំណាក់អ្នកស្នេហាកីឡាប្រដាល់ជាពិសេសអ្នកស្នេហាកីឡាបាល់ទាត់តែម្តង។
ក្នុងការប្រកួតបាល់ទាត់វគ្គជម្រុះ World Cup ក្រុមជម្រើសជាតិអ៊ីរ៉ង់បានលុតក្រុមជម្រើសជាតិកម្ពុជាទក់សាច់ដោយលទ្ធផល 14-0។ នេះជាមូលហេតុដែលអ្នកគាំទ្រជាច្រើនបានបង្ហាញអារម្មណ៍រសាប់រសល់ហើយចង់ឲ្យអ្នកប្រដាល់នៃក្លិបយ័ត្រយោង៩១១រូបនេះសងសឹកជំនួសបាល់ទាត់ហើយបើវាយសន្លប់តែម្តងកាន់តែល្អ។
ទោះបីជាយ៉ាងណាក៏ដោយ នេះគឺជាសម្ពាធមួយដ៏ធ្ងន់ដែលដាក់ទៅលើ ឡៅ ចន្ទ្រា ព្រោះអ្នកគាំទ្រហាក់ដូចជាសង្ឃឹមលើរូបគេទាំងស្រុងថ្វីបើកូនសិស្សរបស់លោកគ្រូ ហង្ស សឿន រូបនេះទើបតែបញ្ចប់ភារកិច្ចប្រកួតកីឡាថ្នាក់ជាតិក៏ដោយ។
គួរបញ្ជាក់ថា ក្រៅពីគូនេះនៅមានគូអន្តរជាតិពីរគូទៀតដែលត្រូវប្រកួតក្នុងកម្មវិធីនេះដូចជា៖ ហ៊ឹម សេរី ត្រូវប៉ះកីឡាករថៃ ដាំង កាន់វ៉ាន និងកីឡាករ មឿន សុខហ៊ុច ប៉ះកីឡាករថៃ យ៉ត ធួនថង។ ការប្រកួតនឹងដំណើរការចាប់ពីម៉ោង៥:៣០នាទីល្ងាចតទៅ៕
