គេនៅចាំបានថា កាលពីឆ្នាំ២០១៤ បេក្ខនារីម្នាក់ ឈ្មោះ សន ស្រីពៅ ស្ថិតក្នុងអាយុ២៣ឆ្នាំ បានឡើងមកប្រឡងកម្មវិធីលំដាប់ថ្នាក់ពិភពលោក The Voice Cambodia រដូវកាលទីមួយ ទាំងកំពុងពពោះកូនក្នុងផ្ទៃ។
នៅពេលនោះ អ្នកនាង បានលើកយកបទ«ឆ្កួតព្រោះស្នេហ៍បង» មកបកស្រាយ ធ្វើឲ្យកៅអី៤របស់ គណៈកម្មការ បានវិលមករករូបនាង។ គ្រាន់តែឃើញបែបនេះ នាងរំភើបឡើងស្រក់ទឹកភ្នែក ហើយប្រាប់គណៈកម្មការថា មិនត្រឹមតែរូបនាងរំភើបទេ សូម្បីតែកូនក្នុងផ្ទៃរបស់នាងក៏រំភើបផងដែរ។
តាមរយៈសម្ដីប៉ុន្មានម៉ាត់នេះ បានធ្វើឲ្យគណៈកម្មការទាំង៤នាក់ ឡើងទៅលើទឹកចិត្តនាងដល់លើឆាក ហើយចុងក្រោយរូបនាង សម្រេចយកកំពូលតារាចម្រៀងដ៏ល្បី ឱក សុគន្ធកញ្ញា ជាគ្រូបង្វឹក ប៉ុន្តែនាងមិនទទួលបានជោគជ័យពីកម្មវិធីខាងលើ បានត្រឹមតែ វគ្គ The Battle Round ប៉ុណ្ណោះ។
បើគិតមកដល់ពេលនេះរយៈពេលប្រមាណជា៨ឆ្នាំហើយដែល សន ស្រីពៅ បានចាកចេញពីសិល្បៈ។ មានន័យថា បច្ចុប្បន្ន នាងអាចមានវ័យប្រមាណ៣១ឆ្នាំហើយ ហើយអ្វីជាការចា់ប់អារម្មណ៍នោះ នាង បានបង្ហាញពីបំណងវិលត្រឡប់ចូលវិថីសិល្បៈវិញ។
ថ្មីៗនេះ នាងបានប្រាប់ថា នឹងវិល មកចាប់អាជីពចម្រៀងជាថ្មីម្តងទៀត ដោយចាប់ផ្តើមទទួលយកការច្រៀងនៅតាមកម្មវិធីប្រគំតន្ត្រីនៃស្ថានីយទូរទស្សន៍នានាហើយ ក៏កំពុងត្រៀមចេញបទ Original Song នៅក្នុងពេលឆាប់ៗខាងមុខនេះផងដែរ។
សន ស្រីពៅ រំពឹងថា មហាជននឹងនៅចាំរូបនាងហើយគាំទ្រដល់ការវិលត្រឡប់មកកាន់អាជីពចម្រៀងឡើងវិញ។ សន ស្រីពៅ បានប្រាប់ថា នឹងចាប់ផ្តើមបំពេញក្តីស្រមៃនឹងប្រឹងប្រែងសាជាថ្មី ព្រោះប្រមាណជាកន្លះឆ្នាំចុងក្រោយនេះនាង និងស្វាមីក៏កំពុងមានបញ្ហារកាំរកូស តែយ៉ាងណា នាងមិនបានបញ្ជាក់ពីមូលហេតុទេដោយគ្រាន់តែលើកឡើងថាជាការអស់ចិត្តរៀងខ្លួនទះដៃម្ខាងមិនឮ ឡើយ។
មានឈ្មោះជាអ្នកម្តាយដែលមានកូនដល់ទៅបីនាក់ក៏ពិតមែន តែ សន ស្រីពៅ នៅតែមានសម្រស់ស្អាតផូរផង់ហើយរូបរាងក៏ស្រឡូនស្អាតមិនធម្មតាឡើយ។ ចំពោះកូនស្រីច្បងរបស់នាងឯណេះវិញក៏មានទេពកោសល្យសិល្បៈមិនចាញ់អ្នកម្ដាយប៉ុន្មាននោះឡើយ៕ ដើម្បីជ្រាបច្បាស់សូមទស្សនាវីដេអូ ខាងក្រោមនេះ ៖
