គេនៅចាំបានថា កាលពីអំឡុងឆ្នាំ២០២១ មានសារព័ត៌មានក្នុងស្រុកជាច្រើន បានចុះផ្សាយជុំវិញដំណឹង កំពូលតារាចម្រៀង ខេមរៈ សិរីមន្ត អាចនឹងចាកចេញពីផលិតកម្មរស្មីហង្សមាស ហើយចូលទៅកាន់ផលិតកម្មGalaxy Navatra របស់អ្នកឧកញ៉ា ឡេង ណាវ៉ាត់ត្រា។
បើតាមការចុះផ្សាយជាច្រើននោះ បានបញ្ជាក់ថា លោក ខេមរៈ សិរីមន្ត បានសម្រេចចិត្តច្បាស់ហើយ ក្នុងការចេញពីទ្រនំចាស់ ហើយនឹងចូលទៅទ្រនំថ្មី គឺផលិតកម្ម Galaxy Navatraដោយអាចនឹងធ្វើឡើងនៅដើមឆ្នាំ២០២២ ខាងមុខនេះ។
ក្រោយពីមានការចុះផ្សាយព្រោងព្រាតបែបនេះ នៅក្នុងការឡាយនិយាយពីគម្រោងដីឡូត៍របស់ខ្លួនកាលពីថ្ងៃទី៤ ខែវិច្ឆិកា ឆ្នាំ២០២១ លោកបាន ដាក់Captionថា«តបតាមសំណួរបងប្អូនពូមីង 50k Views ឡើងទៅ ខ្ញុំនឹងបកស្រាយថាតើខ្ញុំត្រូវចាកក៏ចេញពីហង្សមាសមែនឬអត់?
ទោះយ៉ាងណា ពេលនោះ លោកមិនបានធ្វើការបកស្រាយអ្វីទាំងអស់។ ប៉ុន្តែនៅក្នុងការឡាយនៅយប់ថ្ងៃទី៩ ខែវិច្ឆិកា ឆ្នាំ២០២១ កំពូលតារាចម្រៀងរូបនេះ បានធ្វើការបកស្រាយហើយ ដើម្បីជម្រះមន្ទិលមហាជន ក្រោយសារព័ត៌មានចុះផ្សាយព្រោងព្រាតនោះ។
លោក បានបញ្ជាក់ថា នៅក្នុងពេលបច្ចុប្បន្ននេះ លោកនៅក្នុងកិច្ចសន្យា កុងត្រាជាមួយផលិតកម្មហង្សមាស អញ្ចឹងទម្លាប់របស់លោក លោកធ្វើការកន្លែងណា តែងតែបំពេញភារកិច្ចរបស់ខ្លួនឲ្យបានល្អ។ ចំណែករឿងទៅមុខទៀតថា តើនៅទីនេះទៀត ឬយ៉ាងណា លោកមិនទាន់ដឹងទេ អនាគតនៅវែងឆ្ងាយ តែពេលនេះ នៅក្នុងកិច្ចសន្យាជាមួយគេ ត្រូវធ្វើការឲ្យបានល្អបំផុត។
លោកបន្តទៀតថា កាលលោក នៅផលិតកម្មយូធូប ក៏បែបនេះដែរ ផលិតកម្មបិទបានលោកឈប់ នៅសាន់ដេរក៏ចឹងដែរ ធ្វើការរហូតដល់ផុតកុងត្រាបានឈប់ អញ្ចឹងហើយ ទើបថៅកែផលិតកម្មទាំង២ ទាំង៣ស្រឡាញ់លោកទាំងអស់ ព្រោះធ្វើទៅតាមផ្លូវច្បាប់ និងគុណធម៌ អត់មានទៅរំលោភបំពានសិទ្ធិអ្នកណាទេ។
ទោះយ៉ាងណា ពេលនេះ មានប្រភពទម្លាយថា តារាចម្រៀង ខេមរៈ សិរីមន្ត បានបញ្ចប់កិច្ចសន្យានៅក្នុងផលិតកម្មហង្សមាសនៅក្នុងខែកក្កដាខាងមុខនេះ ហើយ មានការលេចឮថា តារាចម្រៀងដែលស្ពាយងារជាឧកញ៉ា ខេមរៈ សិរីមន្ត កំពុងសម្ងំថតបទចម្រៀងថ្មីៗឱ្យផលិតកម្មរបស់អ្នកឧកញ៉ា ឡេង ណាវ៉ាត្រា ដែលបទចម្រៀងថ្មីៗទាំងនោះ ត្រៀមនឹងពញ្ញាក់អារម្មណ៍អ្នកគាំទ្រនៅក្នុងអំឡុងពេលប៉ុន្មានខែខាងមុខនេះ។
អ្វីដែលកត់ សម្គាល់ បើតាមប្រភពស្និទ្ធជាមួយតារាចម្រៀង ខេមរៈ សិរីមន្ត បានឱ្យដឹងថា នឹងមានពិធីរៀបចំទទួលជាផ្លូវការរបស់តារាចម្រៀង ខេមរៈ សិរីមន្ត ពីសំណាក់ផលិតកម្មហ្គាឡាក់ស៊ីនៅក្នុងពេលឆាប់ៗនេះ៕
