កម្មវិធីប្រដាល់អធិរាជគុនខ្មែរ ISI PALM ដណ្តើមខ្សែក្រវ៉ាត់ប្រាក់និងមាសអមដោយប្រាក់រង្វាន់៤០លានរៀល(១ម៉ឺនដុល្លា) រដូវកាលទី២ប្រភេទទម្ងន់៥៧គីឡូក្រាមរបស់ទូរទស្សន៍ PNN ចាប់ផ្តើមក្នុងខែមករាឆ្នាំ២០២០ខាងមុខនេះ។
កីឡាករ ឡៅ ចិត្រា បានក្លាយជាម្ចាស់ខ្សែក្រវ៉ាត់មាស ISI Palm បន្ទាប់ពីផ្តួលកីឡាករ លន បញ្ញា ឲ្យបោះបង់ការប្រកួតត្រឹមទឹកទី២។ កីឡាករ លន បញ្ញា បានប្រាប់អ្នកកាសែតក្រោយបញ្ចប់ការប្រកួតថា បច្ចេកទេសរបស់អ្នកទាំងពីរគឺមិនលើសគ្នាប៉ុន្មានទេប៉ុន្តែ ចិត្រា រហ័សជាងនិងចេញបានមុនហើយធ្ងន់ៗថែមទៀតផងដែលជាហេតុធ្វើឲ្យរូបគេចេញមិនទាន់។
បេក្ខភាពទាំង៨នាក់ខាងកម្ពុជាមានដូចជា ប៊ុន សុធា, ម៉ន សាម៉េត, លាភ រដ្ធា, វ៉ាន់ វឿន, អេលីត ចំរើន, ឃួន ឡាំងកូស៊ីន, អេ ណារត្ន័និងពេជ្រ ម្ទេសខ្មាំង។
ទោះបីជាយ៉ាងណាក៏ដោយ ខាងកម្មវិធីមិនទាន់បញ្ចេញបេក្ខភាពកីឡាករភាគីខាងថៃនៅឡើយទេ។ មានអ្នកស្នេហាវិស័យកីឡាប្រដាល់ខ្មែរជាច្រើននាក់បានបញ្ចេញមតិគាំទ្រចំពោះសមាសភាពខាងកម្ពុជាដោយមានសង្ឃឹមខ្ពស់ថានឹងអាចទទួលបានខ្សែក្រវ៉ាត់មាស៕
