និយាយដល់ឈ្មោះ អ្នកនាង ស៊ឹម សូលិកា និង លោក អេង ឫទ្ធី នោះ ប្រិយមិត្តច្បាស់ជានឹកឃើញថា គូស្វាមីភរិយា ជាពិធីករ និងពិធីការិនី រាត្រីពណ៌ស្វាយ ទាំង២នាក់នេះ ធ្លាប់បាន ទទួលការគាំទ្រយ៉ាងកុះករពី បងប្អូនមហាជនខ្មែរ ជាពិសេស អ៊ំៗ លោកពូអ្នកមីង និយមស្តាប់បទចម្រៀង តារាខ្មែរជើងចាស់ ពីមុនៗមក។
តាំងពីរៀបការ កាលពីថ្ងៃទី០៩ ខែកញ្ញា ឆ្នាំ២០១៩ រហូតមកដល់ពេលនេះ អ្នកទាំងពីរ មិនទាន់ទទួលដំណឹងល្អ ណាមួយនៅឡើយ។ ទោះយ៉ាងណា អ្នកទាំងពីរ រស់នៅកាន់តែមានសុភមង្គលជាខ្លាំង ជាមួយ កូនស្រីរបស់ តារាស្រី ស៊ឹម សូលិកា ដែលជាកូនអតីតប្ដីមុននោះ។
ក្រៅពីកំពុងរស់នៅយ៉ាងមានសុភមង្គលនោះ ពួកគេទាំង២នាក់ក៏កំពុងសម្បូរសប្បាយចាយលើគំនរទ្រព្យ ជាមួយនឹងការប្រើប្រាស់សម្ភារៈទំនើបៗ ដោយគ្រាន់តែគ្នា៣នាក់ពួកគេមានរថយន្ត៣គ្រឿងបាត់ទៅហើយ ហើយកាលពីប៉ុន្មានខែមុន ទើបតែបង្ហាញរថយន្ត១គ្រឿងលំដាប់មន្ត្រីទូតទៀតផង។
ងាកមកចាប់អារម្មណ៍ កាលពីប៉ុន្មានម៉ោងនេះវិញ ពិធីការិនី ស៊ឹម សូលីកា បានបង្ហាញរូបភាពជាលក្ខណៈគ្រួសារយ៉ាងស្រស់ស្អាតជាមួយលោក អេង ឬទ្ធី ជាស្វាមី រួមនឹងកូនស្រី និងបុរសសង្ហាម្នាក់។
បុរសសង្ហារូបនោះ ត្រូវបានប្រភពបង្ហើបថា ជាអនាគតកូនប្រសា របស់ពិធីការិនីរូបនេះផងដែរ។ បង្ហោះភ្ជាប់ជាមួយរូបភាពជាច្រើនសន្លឹកយ៉ាងស្រស់ស្អាត និងពោរពេញទៅដោយសុភមង្គលជាលក្ខណៈគ្រួសារ, ពិធីការិនី ស៊ឹម សូលីកា បានជូនពរដល់អនាគតកូនប្រសារបស់ខ្លួនថា «សូម រីករាយថ្ងៃកំណើតអូន Ma ០៤ ០៧ ២០២២ សូមជួបសំណាងល្អជោគជ័យគ្រប់ភារកិច្ចកូន»។
បើទោះ ស៊ឹម សូលីកា មិនបានបង្ហើបពីអត្តសញ្ញាណរបស់បុរសសង្ហាវ័យក្មេងនោះក៏ពិតមែនតែ មានការបង្ហើបថា បុរសម្នាក់នេះជាដៃគូ កូនស្រីតែមួយរបស់អ្នកនាង ដែលតាមពាក្យពេចន៍ឃើញថា ផ្អែមល្ហែម តាមមើលអាចនឹងមានដំណឹងល្អនៅក្នុងពេលឆាប់ៗនេះផងក៏អាចថាបាន៕
