កម្មវិធីប្រឡងចម្រៀងលំដាប់ថ្នាក់ពិភពលោកCambodian Idolរដូវកាលទី៤ បានឈានដល់វគ្គLive Showសប្ដាហ៍ទី២ហើយកាលពីយប់ថ្ងៃទី២៤ ខែកក្កដា ជាមួយនឹងបេក្ខជនជើងខ្លាំងចំនួន១៤រូបបានបង្ហាញសមត្ថភាពដើម្បីឲ្យទស្សនិកជនបោះឆ្នោត។
ក្នុងចំណោមបេក្ខជនទាំង១៤រូបនេះ, បេក្ខជន២នាក់ ត្រូវធ្លាក់ចេញពីកម្មវិធីទាំងសោកស្ដាយ ដោយសារសំឡេងបោះឆ្នោតពីទស្សនិកជនតិចជាងគេ។ បេក្ខជនទាំង២រូបនោះ រួមមាន បេក្ខជន ជេន សំរិទ្ធ ដែលត្រូវបានអ្នកគាំទ្រដាក់រហស្សនាមថាជា ឆាយ វីរៈយុទ្ធទី២ និងបេក្ខនារី ជា ស្រីលីស។
ងាកមក បេក្ខជន លីម តិចម៉េង ស្ថិតក្នុងចំណោមបេក្ខជនទាំង១២រូប ដែលជាប់ឈានទៅដល់វគ្គLive Showសប្ដាហ៍ទី៣បន្តទៀត។ មិនថា សប្ដាហ៍ណានោះទេ តិចម៉េង តែងតែធ្វើបានល្អ ហើយទទួលបានការគាំទ្រច្រើនពីទស្សនិកជន។
ទោះយ៉ាងណាអ្វី ដែលកាន់តែពិសេសជាងពេលមុនៗទៅទៀតនោះ ក្នុងវគ្គLive Showសប្ដាហ៍ទី២នេះ តិចម៉េង កាន់តែធ្វើបានល្អ ជាមួយនឹងចម្រៀងមួយបទមានចំណងជើងថា «ម៉ែ» រហូតអន្ទងចិត្ត កំពូលតារាចម្រៀងខេមរៈ សិរីមន្តឲ្យលាន់មាត់សរសើរចំពោះអ្នកខេត្តកំពង់ចាមដូចលោករូបនេះ។
បង្ហោះភ្ជាប់ជាមួយវីដេអូ តិចម៉េង កំពុងបង្ហាញសមត្ថភាពលើឆាកដ៏អស្ចារ្យក្នុងបទ «ម៉ែ», តារាចម្រៀង មានងារជាឧកញ៉ារូបនេះ បានលើកសរសើរថា «ភាគច្រើនអ្នកកំពង់ចាមតូចៗស្ដើងៗ តែធំសំឡេងធំ ហើយធ្ងន់ប្អូនធ្វើបានល្អណាស់យប់មិញបងពេញចិត្ត បងក៏អ្នកកំពង់ចាមដែរ»។
ដោយឃើញការសរសើរបែបនេះ តិចម៉េង បានធ្វើការអរគុណជាមួយនឹងស្ទីកឃ័រទឹកភ្នែក, សំពេះ, បេះដូងលាយលំគ្នា។ ការដាក់ស្ទីកឃ័រទឹកភ្នែកបែបនេះ ទំនងជាលោករំភើប ដែលរូបបានកំពូលតារាចម្រៀងលំដាប់ប្រទេសម្នាក់ លាន់មាត់សរសើរនោះ។ ចំពោះគណៈកម្មការវិញ ក៏ធ្វើការសរសើរចំពោះបេក្ខជនមកពីខេត្តកំពង់ចាមរូបនេះខ្លាំងណាស់ដែរ ក្នុងនោះ សុខ ស៊ីឡាលីនស្ដាប់បណ្ដើរ ញញឹមបណ្ដើរ៕ សូមទស្សនាវីដេអូ ខាងក្រោម ៖
