និយាយដល់ឈ្មោះ ឃុយ ម៉ីហៀង ប្រិយមិត្តមួយចំនួន បានស្គាល់រួចមកហើយថា នាងជាអតីតបេក្ខនារីក្នុងកម្មវិធីប្រឡងចម្រៀងកុមារលំដាប់ថ្នាក់ពិភពលោក The Voice Kids Cambodia រដូវកាលទី១ អំឡុងឆ្នាំ២០១៧ ដោយកាលនោះ ទើបតែមានអាយុ១២ឆ្នាំប៉ុណ្ណោះ។ ដូច្នេះ ពេលនេះ នាងអាចមានអាយុ១៧ទៅ១៨ឆ្នាំ ក្រមុំបាត់ទៅហើយ។
ក្នុងអំឡុងពេលប្រឡងនោះ កូនក្រុមរបស់អ្នកនាង សុគន្ធ និសា រូបនេះ ទោះមិនបានពានក៏ដោយ តែការប្រើប្រាស់ទឹកដមសំឡេងដ៏ពីរោះរបស់នាងក្នុងវគ្គជាបន្តបន្ទាប់ បានធ្វើឲ្យមហាជន មានការពេញចិត្តមិនស្ទើរនោះទេ។
បច្ចុប្បន្ន គេក៏ឃើញ ឃុយ ម៉ីហៀង លេចមុខក្នុងកម្មវិធីតន្ត្រីតូចធំផងដែរ ហើយទឹកដមសំឡេងរបស់នាងនៅតែពីរោះស្រទន់ ដដែល។ ជាក់ស្ដែងថ្មីៗនេះ នាង បានច្រៀងចម្រៀង១បទ នៅលើគណនីទីកតុករបស់ខ្លួន ធ្វើឲ្យអ្នកគាំទ្រលាន់មាត់សរសើរថា ពិតជាពីរោះខ្លាំងណាស់។
ទោះយ៉ាងណា ក៏មានអ្នកលេងបណ្ដាញសង្គមទីកតុកម្នាក់លើកជាសំណូមពរថា «បើប្អូនច្រើនកុំក្រឡាស់អណ្ដាតខ្លាំងពេក អាចនឹងពីរោះជាងនេះ»។ ជាការឆ្លើយតប ឃុយ ម៉ីហៀង បញ្ជាក់ថា «ចា៎អរគុណ ចង់បញ្ជាក់បងថា អណ្ដាតខ្ញុំធំតិច ពេលខ្លះនិយាយធម្មតាក៏មិនសូវច្បាស់ដែរ»។
ដោយឡែកថ្មីៗនេះ ឃុយ ម៉ីហៀង ច្រៀងបទ «មាតាដៃ១០០» នៅក្នុងកម្មវិធីមួយ ហើយត្រូវបានគេយកទៅបង្ហោះក្នុងបណ្ដាញសង្គមទីកតុក ដោយទទួលបានការចាប់អារម្មណ៍ជាខ្លាំង ដោយសារតែរូបនាង ពេញរូបពេញរាង ស្លៀករ៉ូបក្រហម មើលមិនស្គាល់តែម្ដង។
ជាក់ស្ដែង ដោយឃើញវីដេអូនេះភ្លាម ម្នាក់ៗខំមិនថា «មើលមិនស្គាល់, មើលមិនស្គាល់សោះ, ស្អាតជាងមុនខ្លាំងណាស់, សំឡេងពីរោះជាងកាលនៅតូចទៀត, ស្អាតណាស់ប្អូនស្រី មើលមិនស្គាល់ បើមិនប្រាប់ឈ្មោះ, ខានឃើញមុខពេញក្រមុំស្ដូក, ចរិតគួរឲ្យស្រឡាញ់ណាស់ម៉ីហៀង»៕
