ក្រោយ​គេ​រិះគន់ ឈុត សេរី​វាន់​ថង វ៉ៃ​ថយ លោកគ្រូ អេ ភូ​ថង ចេញមុខ​បកស្រាយ​ថា​

​បន្ទាប់​មានការ​រិះគន់​អំពី​ក្បាច់​វាយ​ថយ​របស់​កីឡាករ​វ័យក្មេង ឈុត សេរី​វាន់​ថង ពេល​ប៉ះ​កីឡាករ​ថៃ ភី​ត​សាយ​ឈុន នៅលើ​សង្វៀន​អ្នកតស៊ូ​គុន​ខ្មែរ​គោ​ជល់​ប៉ុស្តិ៍ CNC កាលពី​ល្ងាច​ថ្ងៃ​សៅរ៍​មក លោក អេ ភូ​ថង អតីត​ស្តេច​ប្រដាល់​កម្ពុជា​បានចេញ​មុខ​បកស្រាយ​។​
​លោកគ្រូ អេ ភូ​ថង ដែលមាន​រហស្សនាម​អធិរាជ​កែង​ឆេះ​ជង្គង់​ហោះ​បាន​ពន្យល់ថា កីឡាករ​ថៃ​ហាត់​ក្បាច់​ដំរី​ដែល​មានន័យថា ថៃ​ភាគច្រើន​គេ​ហាត់​យក​រឹង​និង​វ៉ៃ​ក្បាច់​មួយៗ​ដូចនេះហើយ​ទើប​កីឡាករ​ថៃ​ភាគច្រើន​មាន​ជំហរ​រឹង​ដោយសារ​នៅ​ស្រុកថៃ​ការផ្តល់​ពិន្ទុ​មើលទៅ​លើ​ជំហរ​។​
​គ្រូបង្វឹក​នៅ​ក្លិប​ក្រសួងកសិកម្ម​រូបនេះ​បាន​បន្តថា ចំណែក​កីឡាករ​ខ្មែរ​ភាគច្រើន​ហាត់​ក្បាច់​ឥន្ទ្រី មានន័យថា ការ​វ៉ៃ​ចេញ​បាន​ច្រើន​ចំ​គោលដៅ​ពីព្រោះ​នៅ​ខ្មែរ ការផ្តល់​ពិន្ទុ​មើល​ទៅលើ​ការ​វ៉ៃ​ចំ​គោលដៅ​ទាំង​កែង ដៃ ជើង​និង​ជង្គង់​។​
​លោកគ្រូ​បាន​បញ្ជាក់ថា ក្បាច់​ដែល​អាច​ឈ្នះ​ក្បាច់​ដំរី​របស់​ថៃ​បាន​គឺ ក្បាច់​ឥន្ទ្រី​នេះ​តែម្តង​។ របៀប​នៃ​ការ​វ៉ៃ​របស់​កីឡាករ ឈុត សេរី​វាន់​ថង គេ​ហៅថា​ក្បាច់​ឥន្ទ្រី មិនមែន​រត់​ទេ​។ លោកគ្រូ​អះអាងថា នៅពេល​ប៉ះ​កីឡាករ​ថៃ​ដែលមាន​ក្បាច់​ដំរី យើង​ត្រូវតែ​ប្រើ​ក្បាច់​ឥន្ទ្រី​ដូចជា​ការប្រកួត​ជាមួយ ទួន​ប៉េ និង ភិត​សា​ឈុន ជាដើម​៕


Related posts

Leave a Comment