ពេជ្រ សោភា ធ្លាប់បានធ្វើកម្មវិធីសប្បុរសធម៌ជាច្រើនមកហើយដូចជាសាងសង់សាលារៀននៅតំបន់ដាច់ស្រយាល ,ជីកអណ្ដូងទឹក និងជីកស្រះដើម្បីឲ្យពលរដ្ឋ បានប្រើប្រាស់ទឹកនៅតំបន់ជាប់ទល់ដែនវៀតណាមជាដើម ដែលចំណាយលុយអស់ជាច្រើនម៉ឺនដុល្លារ តែនាងកម្រនឹងឃើញមានការចែកចាយនៅលើបណ្ដាញសង្គមដូចគេទៅវិញ។
អ្វីដែលគូរឲ្យកត់សម្គាល់កាលពីថ្ងៃទី១២ ខែសីហា ឆ្នាំ២០២២ នេះសោភា បែរជាលេចមុខនៅកម្មវិធីមួយ ដែលមានឈ្មោះថាសន្និបាតស្រី្ដគ្រីស្ទានខ្មែរ ដែលជាកម្មវិធីរបស់ព្រះវិហារជីវិតថ្មីភ្នំពេញ(គ្រីស្ទាន) ស្ថិតនៅសង្កាត់បឹងកេងកង២ ខណ្ឌចំការមន ក្រុងភ្នំពេញ។ នៅថ្ងៃនោះគេឃើញសោភា បានកាន់ជាមួយព្រះគម្ពីរប៊ីប និងបង្ហាញស្នាមញញឹម ដែលមើលទៅនាងហាក់មានក្ដីសុខផ្លូវចិត្តខ្លាំងណាស់។
អ្នកយកព័តមានយើងបានសាកសួរពេជ្រ សោភា តាមទូរស័ព្ទរឿងនាងធ្វើសប្បុរសធម៌ជាច្រើនលើកច្រើនសា តែមិនសូវបង្ហោះសកម្មភាពតាមបណ្ដាញសង្គម និងការលេចមុខក្នុងការសម្ពោធព្រះគម្ពីរប៊ីបហើយត្រូវបានតារាចម្រៀងល្បីល្បាញជាង១៧ឆ្នាំរូបនេះថា ជីវិតនាងជាគ្រីស្ទបរិស័ទ(ប្រូតេស្ដង់)ពោពេញទៅដោយក្ដីស្រលាញ់ពិតប្រាកដ មិនទាមទារការតបស្នងអ្វីឡើយ។
សោភា បន្ថែមថា នាងបង្កើតក្ដីស្រលាញ់ព្រោះជាគ្រីស្ទាន ហើយនឹងជួយអ្នកខ្វះខាត អ្នកក្រ ដោយអត់ចង់បានសំណង។នាងថាដោយសារតែជាគ្រីស្ទាននេះហើយ ទើបក្ដីស្រលាញ់ល្អ ឬអាក្រក់ និងមានអ្នកខ្លះអ្នកស្អប់នាងជាដើមគឺនាងមិនតបតបនោះទេ។
សោភា ប្រកាន់ទស្សនៈថា ”ទ្រព្យដែលមានតម្លៃបំផុតក្នុងជីវិតម្នាក់ៗ គឺក្ដីស្រលាញ់”។នាងថាស្ទើតែជារៀងរាល់ថ្ងៃអាទិត្យនាងជួបជុំជាមួយគ្រីស្ទបរិស័ទផ្សេងទៀត បម្រើព្រះ ចែករំលែកក្ដីស្រលាញ់។នាងបន្ថែមទៀតថា នៅពេលដែលធ្វើការអធិដ្ឋានទៅព្រះយើងនឹងបាននូវអ្វីដែលចង់បាន ហើយទាល់តែគ្រីស្ទាននិងធ្លាប់សាកទើបបានដឹង។ តារាវ័យ៣៩ឆ្នាំរូបនេះសង្កត់ថា”សន្ដិភាពផ្លូវចិត្ត អត់ត្រូវតែបង្ហាញអ្វីដែលអស្ចារ្យ មានផ្លូវចិត្តគឺសុខ ព្រោះពួកយើងមានព្រះ” ហើយគ្រីស្ទាន(រស់ដើម្បីក្ដីស្រលាញ់”។
ក្រៅពីជាគ្រីស្ទាននោះពេជ្រ សោភា ថា នាងគ្មានតួនាទីអ្វីនៅថ្ងៃសម្ពោធព្រះគម្ពីប៊ីប នោះទេ តែគម្ពីរបើកថ្មីនោះគឺដើម្បីបម្រើរព្រះ ដោយក្ដីស្រលាញ់ស្អាតស្អំ បរិសុទ្ធ។នាងសង្កត់ថាសម្រាប់មនុស្សឯកោខ្លាំង ជួបទុក្ខសោកក្នុងចិត្ត ពេលទៅដល់ព្រះវិហារគ្រីស្ទគឺដូចបានកើតម្ដងទៀត។
គួរបញ្ជាក់ថា ពេជ្រ សោភា បានក្លាយជាគ្រីស្ទានបរិស័ទ(ប្រូតេស្ដង់)រយៈពេល២៥ឆ្នាំ(១៩៩៧-២០២២)មកហើយ ស្របពេលដែលនៅថ្ងៃសម្ពោធព្រះគម្ពីរប៊ីបក្រៅពីរូបនាងគេក៍ឃើញជនល្បីល្បាញផ្សេងៗទៀតចូលរួមជាមួយគ្រីស្ទបរិស័ទរាប់ពាន់នាក់ឯណោះ។
មហាជនកត់សម្គាល់ថា ក្រៅពីតារាចម្រៀងល្បីល្បាញពេជ្រ សោភា ដែលជាគ្រីស្ទាន នោះតារាចម្រៀងខេម ក៏ជាគ្រីស្ទានម្នាក់ដូចនាងផងដែរ ខណៈដែលថ្មីៗនេះគេឃើញតារាសម្ដែងលោករតនៈ ពិសិដ្ឋ ក៍ចូលរួមសម្ពោធព្រះគម្ពីរប៊ីបជាមួយសោភា ដោយទឹកមុខយ៉ាងរីករាយ។
ចំណែកនៅលើហ្វេសបុកឈ្មោះម្លប់ សាសនា ធ្លាប់ចេញសារថាដោយចាត់ទុកសោភា ថាជាវីរៈនារីដ៍ក្លាហាន មានចិត្តសប្បុរសធម៌ពិតៗព្រោះបានជួយសាលារៀន សង្គ្រោះក្មេងនៅវត្ត(ពង្រកជុំតេជោ)នៅឃុំតេជោអភិវឌ្ឍន៍ ខេត្តកំពត។
ហ្វេសបុកSiek Bunnary Charity ធ្លាប់បង្ហោះថា ពេជ្រ សោភា បរិច្ចាគថវិការចំនួន៤០០០០០រៀល ជួយដលបងប្រុសដំបៅខ្នង ប្រព្ធរត់វចោលនៅខេត្ត ព្រះវិហារ។ហ្វេសបុកឈ្មោះសហគមន៍ចាប៉ី អមតៈ ធ្លាប់បង្ហោះសារ ថាពេជ្រ សោភា បានបរិច្ចាគថវិកាចំនួន៥០០ដុល្លារសម្រាប់ទ្រទ្រង់ចាប៉ីដងវែង។
ហ្វេសបុកឈ្មោះSiek Bunnary Charity ធ្លាប់បង្ហោះថាពេជ្រ សោភា បានជួយពលរដ្ឋរងគ្រោះដោយទឹកជំនន់ នៅខេត្តពោធិ៍សាត់ចំនួន២០០គ្រួសារ និងមានអំណោយមួយចំនួនទៀត ដែលពេជ្រ សោភា បានធ្វើសប្បុរសធម៌ដូចជានាងធ្លាប់បរិច្ចាគថវិកាចំនួន១០០០ដុល្លារចូលរួមជាមួយរដ្ឋាភិបាលទប់ស្កាត់កូវីដ, តែសោភា មិនដែលបង្ហាញការធ្វើសប្បុរសធម៌ ដែលចំណាយដោយថវិការបស់នាងផ្ទាល់ខ្លួននោះនៅលើបណ្ដាញសង្គមឡើយ ប៉ុន្តែភាគច្រើនគឺអ្នកទទួលអំណោយពីនាងទេ ដែលបង្ហោះសារថ្លែងអំណរគុណនាង៕
