ប្រិយមិត្តមួយចំនួន ទំនងជាបានជ្រាបរួចមកហើយថា តាំងពីបង្ហាញវត្តមានចូលរួមក្នុងកម្មវិធីប្រឡងចម្រៀងលំដាប់ថ្នាក់ពិភពលោកCambodian Idolរដូវកាលទី៤មកនោះ គេតែងតែឃើញ បេក្ខជន លីម តិចម៉េង មានទឹកញញឹមស្រស់ស្រាយ សប្បាយចិត្ត។
ដោយឡែក ថ្មីៗនេះ មានអ្នកលេងបណ្ដាញសង្គមហ្វេសប៊ុកមួយចំនួន បានគាស់កកាយរឿងអតីតកាលរបស់តិចម៉េង ដែលបង្ហាញការមិនពេញចិត្តចំពោះហ្វេនBTS និងនិយាយប៉ះពាល់ដល់ពួកគេនោះ ជាហេតុធ្វើឲ្យអ្នកគាំទ្រក្រុមកូរ៉េដ៏ល្បីខាងលើ លើកគ្នាមកប្រតិ,,កម្មឥតឈប់។
ប្រការនេះ លីម តិចម៉េង បានចេញមុខសុំទោសរួចហើយ តែនៅតែមានអ្នកគាំទ្រមួយចំនួនរបស់ក្រុមតារាកូរ៉េខាងលើ មិនសុខចិត្តដដែល ធ្វើឲ្យតិចម៉េង បានត្រឹមត្រៀមចិត្តទទួលយកចំពោះរឿងនេះ ព្រោះអ្វីៗលោកបានទទួលស្គាល់កំហុស និងសុំទោសអស់ហើយ។
ទំនងដោយសាររឿងខាងលើនេះ ទើបនៅក្នុងការបង្ហាញសមត្ថភាពនៅយប់ថ្ងៃទី១៤ ខែសីហា ឆ្នាំ២០២២ក្នុងCambodian Idol រដូវកាលទី៤ ក្នុងវគ្គLive Showសប្ដាហ៍ទី៥នេះ លីម តិចម៉េង បានច្រៀងបទ «អាក្របី» ទាំងទឹកមុខក្រៀមក្រំ មិនបង្ហាញស្នាមញញឹមដូចពេលកន្លងមកនោះឡើយ។
ទោះយ៉ាងណា ពេលច្រៀងចប់ បេក្ខជនរូបនេះ មិនត្រឹមតែបាត់សំឡេងគាំទ្រនោះទេ បែរជាមានការស្រែកហ៊ោកញ្ឆៀវអបអរសាទរ និងបង្ហាញការលើកទឹកចិត្តលោកលើសដើមឡើងកក្រើកស្ទូឌីយោ ធ្វើឲ្យរូបលោក ទប់ទឹកភ្នែកមិនជាប់ ហូរធ្លាក់មកតែម្ដង។
ការបង្ហាញសមត្ថភាពច្រៀងរបស់ លីម តិចម៉េង ក្នុងបទបែបស្រុកស្រែនេះ នៅតែធ្វើបានល្អ ហើយត្រូវគណៈកម្មការសរសើរមិនដាច់ពីមាត់ ព្រោះតែសំឡេងដូចចាក់ឌីសរបស់លោកនោះ៕ ដើម្បីកាន់តែជ្រាបច្បាស់ទៀតនោះ សូមទស្សនាវីដេអូ ខាងក្រោមនេះ ៖
