លោកអ្នក បានជ្រាបរួចមកហើយថា បច្ចុប្បន្ន លោកអេង ឫទ្ធី កំពុងរស់នៅយ៉ាងមានក្ដីសុខជាមួយនឹងប្រពន្ធរបស់ខ្លួនគឺអ្នកនាង ស៊ឹម សូលិកា រួមនឹងកូនស្រីម្នាក់ បន្ទាប់ពីពួកគេ បានរៀបការជាមួយគ្នាកាលពីថ្ងៃទី០៩ ខែកញ្ញា ឆ្នាំ២០១៩កន្លងទៅនេះ។
ក្រៅពីអាជីពជាពិធីករ និងពិធីការិនី ប្រចាំស្ថានីយទូរទស្សន៍បាយ័ននោះ ប្ដីប្រពន្ធដ៏ផ្អែមល្ហែមមួយនេះ ក៏មានសក្ដិពាក់លើកស្មាផងដែរ ដោយអ្នកនាង ស៊ឹម សូលិកា ស្ថិតក្នុងអាយុ៤១ឆ្នាំ មានឋានៈជា វីរសេនីយ៍ទោ ក្នុងមុខងារ ជាជំនួយការ នៅអង្គភាព ទីចាត់ការផែនការ អបក។
ដោយឡែក លោក ម៉ែន អេង ហៅ អេង រិទ្ធី នាយទាហាននៃកងយោធពលខេមរភូមិន្ទក្រសួងការពារជាតិ អត្តលេខ១៦៣២១៤ ទទួលបានការដំឡើងឋានន្តរសក្ដិថ្នាក់ឧត្តមសេនីយ៍ត្រី (ផ្កាយ១) ដោយព្រះរាជក្រឹត្យលេខនស/រកត/១១១៦/១០០៧ ចុះថ្ងៃទី១០ ខែវិច្ឆិកា ឆ្នាំ២០១៦
បន្ទាប់ពីទទួលបានការដំឡើងឋានន្តរស័ក្តិថ្នាក់វរសេនីយ៍ឯក (ស័ក្តិ៥) ដោយអនុក្រឹត្យរបស់រាជរដ្ឋាភិបាលលេខ៨៤០អនក្រ.តត ចុះថ្ងៃទី០២ ខែមិថុនា ឆ្នាំ២០១៤ (រយៈពេលប្រមាណ២ឆ្នាំ០៥ខែក្រោយមក)។
ក្រោយមក លោក ម៉ែន អេង ត្រូវបានតែងតាំង និងដំឡើងឋានៈជាសមាជិកគណៈកម្មាធិការសិទ្ធិមនុស្សកម្ពុជា (CHRC) ឋានៈស្មើអនុរដ្ឋលេខាធិការ បន្ថែមលើមុខងារបច្ចុប្បន្ន ដែលត្រូវបានឡាយព្រះហស្ថលេខាដោយ ព្រះមហាក្សត្រ ព្រះបាទសម្តេចនរោត្តម សីហមុនី ព្រះមហាក្សត្រ នៃកម្ពុជា កាលពីថ្ងៃទី១៧ ខែធ្នូ ឆ្នាំ២០១៨។
ក្រោយមកទៀត លោក ម៉ែន អេង ត្រូវបាន រដ្ឋាភិបាល តែងតាំងជាអភិបាលខេត្តរងស្វាយរៀង។ នេះបើយោងតាមអនុក្រឹត្យរបស់រាជរដ្ឋាភិបាល និងចុះហត្ថលេខាដោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា ចេញថ្ងៃទី១៨ ខែសីហា ឆ្នាំ ២០២២។
យោងតាមអនុក្រឹត្យដដែល សម្តេចនាយករដ្ឋមន្ត្រី ហ៊ុន សែន ក៏បានតែងតាំងមន្ត្រីរាជការ៣៤រូប ផ្សេងទៀត ជាអភិបាលរងខេត្តស្វាយរៀងផងដែរ។ អភិបាលរងខេត្តស្វាយរៀងថ្មីៗ៣នាក់ទៀត រួមមាន៖ លោក ប៉េង ពោធិ៍សា ឋានន្តរស័ក្កឧត្តមអភិបាលថ្នាក់លេខ៦ នៃក្របខណ្ឌមន្ត្រីរាជការនៃក្រុមនីតិប្បញ្ញត្តិ។ លោកជាប្រធាននាយកដ្ឋានហិរញ្ញវត្ថុ នៃអគ្គលេខាធិការដ្ឋានរដ្ឋសភា។ លោក សុខា រ៉ាម ឋានន្តរស័ក្តិវរមន្ត្រី ដែលជាអភិបាលស្រុករំដួល និងលោកស្រី យក់ ស៊ីណាត ឋានន្តរស័ក្តិវរមន្ត្រីថ្នាក់លេខ៣៕
