និយាយដល់ការប្រឡងដំបូងក្នុងវគ្គJudge Audition បេក្ខជន ស៊ឹម ច័ន្ទពន្លឺ ស្ថិតក្នុងអាយុ២៩ឆ្នាំ មកពីខេត្តតាកែវ ធ្វើបានយ៉ាងល្អក្នុងបទចម្រៀងជាភាសាអង់គ្លេស បូករួមទាំងរូបរាងសង្ហាទៀតនោះ ធ្វើឲ្យលោកគ្រូពេទ្យរូបនេះ ទាក់ចិត្តមនុស្សស្រីមិនតិចនាក់នោះទេ។
ស្របពេលមានការលង់នឹងសម្រស់គ្រូពេទ្យជាច្រើន នាពេលនោះ បែរជាមានអ្នកខ្លះ មិនពេញចិត្ត ចោទថា គ្រូពេទ្យរូបនេះ ជាវៀតណាម ជាចេក ជាដើម ទាំង ដែលពេលប្រឡងកម្មវិធី The Voiceនៅប្រទេសវៀតណាម រូបលោក បានប្រាប់ច្បាស់ៗហើយថា ជាជនជាតិកម្ពុជា ហើយក្នុងការឡាយកន្លងមក ក៏បានបញ្ជាក់រួចហើយថា លោកសុំាអស់ហើយរឿងស្រីបោក បើថាសួរចេក មិនចេកអត់ដឹងទេ។ នេះចង់បញ្ជាក់ថា លោកគ្រូពេទ្យមិនមែនចេកនោះទេ។
បន្ទាប់ពីមានការរិះ,,គន់រួចមក លោកគ្រូពេទ្យសម្បូរស្នេហ៍រូបនេះ នៅតែបន្តធ្វើបានយ៉ាងល្អពីមួយវគ្គទៅមួយវគ្គរហូតឈានដល់វគ្គLive Show នៅតែទទួលបានសំឡេងបោះឆ្នោតច្រើនពីទស្សនិកជនដដែល។ ការជាប់ម្ដងហើយម្ដងទៀតនោះ ត្រូវបានអ្នកមិនពេញចិត្តមួយចំនួនថា ជាប់ដោយសារខ្សែ ដោយសាររូបរាងសង្ហា ជាដើម។
ត្រង់ចំណុចនេះ លោកគ្រូពេទ្យ ស៊ឹម ច័ន្ទពន្លឺក៏បានបកស្រាយយ៉ាងក្បោះក្បាយរួចហើយថា បើមានខ្សែពិតមែននោះ លោកមិនមកប្រឡងនោះទេ ចេញច្រៀងយកតែម្ដង។ ទោះជាលោកគ្រូពេទ្យធ្វើការបកស្រាយយ៉ាងចិត្តត្រជាក់ជាបន្តបន្ទាប់យ៉ាងណា ក៏សំឡេងនៃការរិះ,,គន់នៅតែបន្ត។
ជាក់ស្ដែង ឈានដល់វគ្គផ្ដាច់ព្រ័ត្រ លោកគ្រូពេទ្យសម្បូរស្នេហ៍រូបនេះ ច្រៀងពីរោះ ធ្វើបានល្អជាងវគ្គមុនៗទៅទៀត តែក្នុងគំនិតអ្នកស្អប់ នៅតែយល់ថា មិនពីរោះដដែល ចេះតែជាប់ដល់វគ្គនេះ កើតជាដើមនោះ។
ងាកមកគណៈកម្មការ ណុប បាយ៉ារិទ្ធ យល់ច្បាស់ពីចំណុចនេះ ពេលស៊ឹម ច័ន្ទពន្លឺ បកស្រាយចម្រៀង៣បទជាប់គ្នាចប់ក្នុងវគ្គផ្ដាច់ព្រ័ត្រនោះ លោក ក៏បានលើកសរសើរដល់បេក្ខជនរូបនេះ ថាពិតជាធ្វើបានយ៉ាងអស្ចារ្យក្នុងចម្រៀង៣បទនេះ។
បន្ថែមលើនេះ ណុប បាយ៉ារិទ្ធ បានលើកទឹកចិត្ត និងទទូចអង្វរដល់មហាជនដូច្នេះថា «ឱកាសនេះ ខ្ញុំចង់និយាយថា ពន្លឺ គាត់បានប្រឹងប្រែងអស់ពីសមត្ថភាពហើយ ផ្ដល់កម្លាំងចិត្តឲ្យគាត់ផង គ្រាន់តែបេក្ខជនធម្មតា នៃកម្មវិធីតែប៉ុណ្ណោះ ប្រជាជនកម្ពុជាយើងទាំងអស់គ្នា ក្រែងស្រឡាញ់គ្នាដូចគ្នាមែនអត់? ហេតុអ្វីបានត្រូវដាក់សម្ពាធគាត់
ខ្ញុំពិតជាសរសើរ សរសើរអស់ពីទឹកចិត្ត ដែលបេក្ខជនម្នាក់នេះមានចិត្តអត់ធ្មត់ មានចិត្តពុះពារជាមួយក្ដីស្រមៃខ្លួនឯង ដោយមិនតបជាមួយនឹងការប៊ូលី ក៏ដូចជាការប្រ,,មាថផ្សេងៗ ប៉ុន្តែពេលនេះម៉ោងនេះ បេក្ខជនពន្លឺ បានបញ្ចេញសមត្ថភាពហើយ អញ្ចឹងប្រជាជនទូទាំងប្រទេសជាអ្នកសម្រេចលទ្ធផល ហើយបងប្អូននៅទីនេះជាកសិណសាក្សីជាមួយនឹងសមត្ថភាពរបស់ប្អូន
បើសិនពន្លឺមានសមត្ថភាពគ្រប់គ្រាន់ គឺជាជោគវាសនារបស់គាត់ ប៉ុន្តែខ្ញុំចង់យកសំឡេងខ្ញុំ ក្នុងនាមជាគណៈកម្មការមួយរូបនៅក្នុងថ្ងៃនេះ សុំអង្វរចិត្តដល់បងប្អូនទាំងអស់គ្នា ប្រសិនបើមានរឿងអ្វីកើតឡើង ពេញចិត្ត ឬមិនពេញចិត្ត សុំទុកក្នុងចិត្តហើយវិនិច្ឆ័យ ហើយជំនួសមកវិញនូវវប្បធម៌ខ្មែរដ៏ល្អប្រសើរ គឺការលើកទឹកចិត្ត ការផ្ដល់ជាមតិស្ថាបនាផ្សេងៗ…»។
ងាកមកចាប់អារម្មណ៍លោកគ្រូពេទ្យសម្បូរស្នេហ៍ ស៊ឹម ច័ន្ទពន្លឺ ពេលលោក ណុប បាយ៉ារិទ្ធ ផ្ដល់យោបល់លើកទឹកចិត្តជាមួយសម្ដីដ៏ចាក់ដោតនោះ រូបលោកពិតជារឹងមាំខ្លាំងណាស់ ខំយកដៃស្ទាបទ្រូង ទប់ទឹកភ្នែកមិនឲ្យស្រក់ហូរ ដើម្បីទាមទារការអាណិតឡើយ ខណៈអ្នកគាំទ្រមួយចំនួនស្ដាប់ហើយ ឃើញហើយ ស្រក់ទឹកភ្នែកជំនួសនោះ។
តាមរយៈសម្ដីដ៏មុតស្រួចរបស់គណៈកម្មការ ណុប បាយ៉ារិទ្ធ អមដោយភាពអត់ធ្មត់ ខំទប់ទឹកភ្នែកពីសំណាក់ បេក្ខជន ស៊ឹម ច័ន្ទពន្លឺ ធ្វើឲ្យមហាជនជាច្រើន បានសម្ដែងការអាណិត ស្រឡាញ់ និងសរសើរដល់លោកគ្រូពេទ្យ ស៊ឹម ច័ន្ទពន្លឺ រូបនេះជាខ្លាំង។ ក្នុងនោះ ពួកគេ ក៏បានសរសើរដល់ពាក្យពេចន៍ដ៏រសើប និងមានន័យ របស់លោក ណុប បាយ៉ារិទ្ធ ផងដែរ៕
