កន្លងមក ប្រិយមិត្តអ្នកអានទាំងអស់ បានឃើញរួចមកហើយថា បេក្ខជនTop 4ក្នុងកម្មវិធីប្រឡងចម្រៀងលំដាប់ថ្នាក់ពិភពលោកCambodian Idol រដូវកាលទី៤ សុទ្ធតែទទួលបានការស្វាគមន៍យ៉ាងរាក់ទាក់ពីអ្នកគាំទ្រ រហូតដល់មានអ្នកខ្លះថែមទាំងហ៊ានឱបថើបអាយដលរបស់ពួកគេបង្ហោះជាសាធារណៈទៀតផង។
ក្នុងចំណោមបេក្ខជនTop 4នេះទៀតសោត អ្នក ដែលត្រូវបានមហាជនមើលឃើញថា ទទួល បានស្នាមថើបពីអ្នកគាំទ្រច្រើនជាងគេ ហើយល្បីកក្រើកបណ្ដាញសង្គមនោះ រួមមានម្ចាស់ពាន លីម តិចម៉េង និងម្ចាស់បេះដូងសយ ថុល សុភិទិ។
បើត្រឡប់ទៅនិយាយពីបេក្ខជនរដូវកាលមុនៗវិញ គេកម្រឃើញមានអ្នកគាំទ្រផុសផុលបែបនេះណាស់ ខណៈរដូវកាលទី៤នេះ មានប្រជាប្រិយភាពមិនធម្មតា សូម្បីតែចំនួនអ្នកទស្សនាផ្ទាល់ក្នុងវគ្គផ្ដាច់ព្រ័ត្រលើទំព័រហ្វេសប៊ុកCambodion Idol ក៏មានចំនួនច្រើនជាងរដូវកាលណាណា ទាំងអស់ដែរ រហូតដល់ជាងកន្លះលាននាក់នោះ។
ទោះយ៉ាងណា ម្ចាស់ពានកម្មវិធីប្រឡងចម្រៀងលំដាប់ថ្នាក់ពិភពលោក Beat The Best សួ វិចិត្រ ដែលមានសម្បុរខ្មៅ រូបរាង មុខមាត់ មិនសូវសង្ហាដូចបេក្ខជនល្បីៗមួយចំនួននោះ ក៏ទទួលបានស្នាមថើបពីអ្នកគាំទ្រផងដែរ រហូតដល់រូបគេបង្ហាញអារម្មណ៍ថ្មីមួយទៀតឲ្យអ្នកគាំទ្រទាំងអស់បានដឹង។
បង្ហោះភ្ជាប់ជាមួយវីដេអូ និងរូបថតជាច្រើនសន្លឹកជាមួយអ្នកគាំទ្រ នៅព្រឹកថ្ងៃទី៣ ខែកញ្ញា សួ វិចិត្រ បានបង្ហាញអារម្មណ៍ដូច្នេះថា «ខ្ញុំទទួលបានអារម្មណ៍ថ្មី និងរីករាយណាស់ អរគុណសម្រាប់ការគាំទ្រអរគុណសម្រាប់ការទស្សនាផ្ទាល់ និងតាមការLiveដ៏ច្រើនបែបនេះ នេះជាអារម្មណ៍លើកទីមួយសម្រាប់ខ្ញុំ ឧត្តមានជ័យ»៕ សូមទស្សនាវីដេអូ ខាងក្រោម ៖
