ក្រោយខកខានអស់រយៈពេលប្រមាណ៣ឆ្នាំ ទីបំផុត កម្មវិធីប្រឡងចម្រៀង កុមារលំដាប់ថ្នាក់ ពិភពលោក The Voice Kids Cambodia រដូវកាលទី៣ វគ្គ The Blind Audition សប្ដាហ៍ទី២ បានចាប់ផ្តើមហើយកាលពីយប់ ថ្ងៃទី០១ ខែតុលា ឆ្នាំ២០២២កន្លងទៅនេះ។
អ្វីជាការចាប់អារម្មណ៍នោះ, កុមារីមកបង្ហាញសមត្ថភាព សុទ្ធតែឆ្លាត ស្អាត ច្រៀងពីរោះ ជាមួយទឹកមុខ កាយវិការ គួរឲ្យស្រឡាញ់។ ជាក់ស្ដែង ងាកមក ចាប់អារម្មណ៍ កុមារីម្នាក់ឈ្មោះ ពិសី ស្រីនីន ស្ថិតក្នុងអាយុ៩ឆ្នាំ បានលើកឡើងឆាក ច្រៀងយ៉ាងពីរោះ និងក្លាហាន ថែមទៀតផង រហូតទទួលបានការចុចប៊ូតុង៣ពីគណៈកម្មការ។
នៅពេលនោះ គណៈកម្មការ ឱក សុគន្ធកញ្ញា បានសួរនាំរឿងរ៉ាវជាមួយចំនួនពាក់ព័ន្ធនឹងការច្រៀង ហើយកុមារីស្ថិតក្នុងវ័យ៩ឆ្នាំរូបនេះ ក៏បានប្រាប់ថា ចេះច្រៀងតាមប៉ា ដោយសារតែឪពុករបស់ខ្លួន ចេះច្រៀងចូល១០ឆ្នាំទៅហើយ។ ដោយឮបែបនេះ ឱក សុគន្ធកញ្ញា ក៏ស្នើសុំឲ្យប៉ាឡើងមកលើឆាកជាមួយកូនតែម្ដង។
ពេលមកដល់លើឆាកនោះ គណៈកម្មការក៏បានស្វាគមន៍ឪពុករបស់កុមារីខាងលើ ហើយសួរនាំរឿងរ៉ាវមួយចំនួនពាក់ព័ន្ធនឹងកូន ស្រាប់តែគេឃើញឪពុកកុមារី ពិសី ស្រីនីន បែរជាឆ្លើយជាមួយនឹងអារម្មណ៍ភ័យញ័រទទ្រើត រហូត លោក ហ្សូណូ ឡើងទៅឈរក្បែរឲ្យកម្លាំងចិត្តតែម្ដង។
ដោយឃើញបែបនេះ ឱក សុគន្ធកញ្ញា ក៏ដាច់ចិត្តសួរថា កូនក្លាហានណាស់ តែប៉ាៗដូចរាងភ័យ? ទើបឪពុកកុមារីខាងលើឆ្លើយតបវិញថា ភ័យ ធ្លាប់តែឡើងឆាកខ្នាតតូច ដល់ឡើងមកតន្ត្រីធំរាងភ័យដែរ។ ក្រោយឆ្លើយតបបែបនេះភ្លាម ហ្សូណូ ស្ទាបបេះដូងឪពុកកុមារីខាងលើនេះភ្លែត ដើម្បីកាត់បន្ថយអារម្មណ៍ភ័យខ្លាច ក៏ដូចជាបង្កបរិយាកាសរីករាយនោះ។
អ្វីកាន់តែពិសេសទៀតនោះ គណៈកម្មការបានលើកទៅលើកទឹកចិត្តទាំងអស់ ហើយថែមទាំងស្នើសុំឲ្យឪពុកកុមារីខាងលើច្រៀង១បទផងដែរ។ ឪពុកកុមារីខាងលើ បានតបតាមសំណូមពរ ដោយច្រៀងយ៉ាងពីរោះ ប្រកបដោយទំនុកចិត្ត ហើយមើលទៅហាក់មិនភ័យខ្លាចទៀតនោះឡើយ។
ក្រោយឪពុកបកស្រាយចម្រៀងចប់ដល់វគ្គកូនវិញម្ដង ក៏បានសម្រេចចិត្តជ្រើសរើស តារាចម្រៀង ឱក សុគន្ធកញ្ញា ជាគ្រូបង្វឹក បើទោះតារាចម្រៀង ហ្សូណូ ខំពន្យល់ ទាក់ទាញ ឲ្យចូលក្រុមខ្លួនប៉ុណញណាក៏ដោយចុះ ក៏គ្មានប្រសិទ្ធភាពនោះដែរ៕ ដើម្បីជ្រាបច្បាស់សូមទស្សនាវីដេអូ ខាងក្រោមនេះ ៖
