កម្មវិធី «រត់ជាមួយសាយ ៤ សែន ជំហាន» បានចាប់ផ្តើមដំណើរការហើយ ដោយក្នុងការរត់ក្នុងយុទ្ធនាការនេះ ចាប់ផ្តើមនៅព្រឹកថ្ងៃទី ២២ ខែតុលា ឆ្នាំ ២០២២ ដល់ថ្ងៃទី ៣០ ខែតុលា ឆ្នាំ ២០២២ មានរយៈពេល ៩ ថ្ងៃ ក្នុងរយៈចម្ងាយ ៣០៣ គីឡូម៉ែត្រ ទៅកាន់ខេត្តសៀមរាម ដើម្បីប្រមូលថវិកាចំនួន ៤០ ម៉ឺនដុល្លារ ជួយដល់មន្ទីរពេទ្យកុមារអង្គរ ទ្រទ្រង់ព្យាបាលផ្នែកមហារីក។
ដំណើរនៃការរត់ថ្ងៃដំបូងនៃ «រត់ជាមួយសាយ ៤ សែន ជំហាន» ដែលបានចាប់ផ្តើមឡើងនៅព្រឹកវេលាម៉ោង ៥ និង ៣០ នាទី ព្រឹកមិញនេះ នៅឯសហភាពសហព័ន្ធយុវជនកម្ពុជា រាជធានីភ្នំពេញ គឺមានការចូលរួមជូនដំណើរយ៉ាងច្រើនកុះករពីថ្នាក់ដឹកនាំ សិល្បករ សិល្បការិនី និង អ្នកគាំទ្រផងដែរ។
ក្នុងនោះដែរ នៅព្រឹកថ្ងៃដំបូងនៃការរត់ ដោយមានការរៀបចំកម្មវិធីពិសេស «៩ គីឡូ ជូនដំណើរ សាយ» មហាជនក៏បានចាប់អារម្មណ៍ទៅដល់តារាស្រីស្រស់សោភាកញ្ញា ស៊ិន យូប៊ីន ដូចគ្នាដែរ ដោយតារាសម្តែងល្បីឈ្មោះរូបនេះ បានចាប់ដៃប្អូនស្រីជាទីស្រឡាញ់ គឺតារាសម្តែង ជេននី មកចូលរួម ដើម្បីផ្តល់កម្លាំងចិត្តដល់លោក សាយ ថែមទៀតផង។
តារាស្រី ស៊ីន យូប៊ីន និង តារាស្រី ជេននី បានធ្វើឱ្យមហាជនពោលពាក្យសរសើរសឹងមិនជឿដែរថា តារាស្រីតូចល្អិត ២ រូប ជាបងប្អូនខាងលើនេះ បានស៊ូរត់រហូតដល់គោលដៅ ៩ គីឡូម៉ែត្រថែមទៀតផង។ ជាងនេះទៅទៀត បើក្រឡេកទៅមើលសកម្មភាពនៃការរត់របស់កញ្ញា ស៊ិន យូប៊ីន និង កញ្ញា ជេននី វិញ ទោះជាស្ថិតក្នុងកាលៈទេសៈណាក៏មើលទៅនៅតែបង្ហាញស្នាមញញឹម ឃ្យូដគួរឱ្យស្រឡាញ់ណាស់៕
