កាលពីរាត្រីថ្ងៃទី ២៥ ខែតុលា ឆ្នាំ ២០២២ កន្លងទៅនេះ គឺជារាត្រីមួយដែលមហាជនអ្នក និយមតាមដានកម្មវិធីប្រកួតសម្រស់ មានអារម្មណ៍រំភើបជាខ្លាំង ក្រោយពីតាមដានអស់រយៈពេលដ៏យូរ ទីបំផុតកម្មវិធី Miss Grand International 2022 ក៏បានរកឃើញម្ចាស់តំណែងថ្មីហើយ ដោយបានទៅលើបវរកញ្ញាមកពីប្រទេសប្រេស៊ីល នាង Isabella Menin អាយុ ២៦ ឆ្នាំ និង បញ្ចប់ថ្នាក់អនុបណ្ឌិតផ្នែកគណនេយ្យ និង ហិរញ្ញវត្ថុ។
ចំពោះលទ្ធផល ដែលទទួលបានកាលពីយប់ម្សិលមិញនេះ បានធ្វើឱ្យមហាជនជាច្រើនស្ទើរពាសពេញពិភពលោក មានការអបអរសាទរជាខ្លាំងចំពោះម្ចាស់ជយលាភី ក៏ដូចជាលំដាប់រងនីមួយៗ។ ទោះជាយ៉ាងណា ក៏មានអ្នកគាំទ្របណ្ដាប្រទេសមួយចំនួនទៀត ពោលគឺ ប្រទេសវៀតណាម ហាក់បង្ហាញការមិនពេញចិត្តខ្លាំង ចំពោះលទ្ធផលដែលបវរកញ្ញាតំណាងឱ្យប្រទេសរបស់ខ្លួន មិនបានទទួលលទ្ធផលល្អ រហូតមានការរិះគន់វាយប្រហារកម្មវិធី និង នាំគ្នាចុច unfollow ជាង ២ លាន Followers ក្នុងគណនីផ្លូវការរបស់កម្មវិធី MGI លើ Instagram ផងដែរ។
ទន្ទឹមនឹងឃើញធ្លាក់ Follow យ៉ាងច្រើននេះ លោក Nawat ដែលជាស្ថាបនិកកម្មវិធី ក៏បានចេញបង្ហោះសារយ៉ាងចាក់ដោតមួយ ថែមទាំងភ្ជាប់ជាមួយទង់ជាតិប្រទេសវៀតណាម ហើយសរសេរថា ៖ «ខ្ញុំបានពិនិត្យគណនីអ៊ីស្តាក្រាម MIG រួចរាល់ហើយ ភាគច្រើនអ្នកដែលចុច Unfollow គឺអ្នកគាំទ្រប្រទេសវៀតណាម។ អរគុណដែលចុច Unfollow យើងនៅតែគោរព និង ផ្តល់ភាពយុត្តិធម៌ចំពោះគ្រប់គ្នា និង បណ្ដាប្រទេសផ្សេងៗ»។
ដោយឡែកក្រោយការបង្ហោះសារហើយនោះ ស្ថាបនិកកម្មវិធី MGI រូបនេះ ក៏បានធ្វើការឡាយវីដេអូបន្តនិយាយបកស្រាយឱ្យកាន់តែច្បាស់ជាមួយអ្នកគាំទ្រប្រទេសវៀតណាម ដោយរូបលោកបានរៀបរាប់ថា ៖ «វាជាកម្មវិធីប្រកួតសម្រស់ដោយមិនលំអៀង ឱ្យខ្ញុំផ្ដល់ឱ្យអ្នករបៀបមិច? វាមិនអាចទៅរួចទេ វៀតណាម។ ប្រសិនបើអ្នកមិនចូលចិត្តខ្ញុំ អ្នកចង់ធ្វើអីក៏ធ្វើទៅ។ អ្នកទៅមើលមើល៍ប្រទេសហ្វីលីពីន បានត្រឹម Top 20 ដូចអ្នកដែរ។ អ្នកក៏ឃើញថាមានប្រទេសជាច្រើនមិនបានឡើងដូចនៅអាស៊ីដែរ។ ម៉ាឡេស៊ីក៏ស្រស់ស្អាតជាង ឡាវក៏ស្រស់ស្អាតជាង ហើយឥណ្ឌាក៏ស្រស់ស្អាតជាង តែពួកគេមិនបានជាប់ឡើងទេ តែអ្នកបានឡើងដល់ Top 20។ ដល់អ៊ីចឹង ខ្ញុំមិនយល់សោះ! អ្នកដឹងហើយខ្ញុំដាក់ពិន្ទុលើអ្វីទាំងអស់ ហើយសូម្បីតែទង្វើរបស់អ្នកទាំងអស់គ្នាពេលនេះ ក៏ជាពិន្ទុរបស់អ្នកនៅពេលអនាគតដូចគ្នា។ អូខេ ឈប់សួរខ្ញុំទៀត វាពឹងទៅលើលក្ខណៈសម្បត្តិរបស់អ្នក មិនមែនពឹងលើឈ្មោះប្រទេសរបស់អ្នកឡើយ។ ខ្ញុំចូលចិត្តប្រទេសអ្នក តែនេះគឺជាការប្រកួតប្រជែងបវរកញ្ញា»៕
