តារាចម្រៀងតន់ ចន្ទសីម៉ា ជាអតីតជាសិស្សជយលាភីស្មូតកំណាព្យលេខ១ប្រចាំ ខេត្តតាកែវ ហើយមាននិស្ស័យសិល្បៈទាំងពីកំណើត ដោយនាងពេលឈានជើងចូលមកកាន់ទីក្រុងភ្នំពេញដំបូង មានតែម្នាក់ឯង គ្មានគ្រួសារ សាច់ញាតិអ្វី ដែលអាចពឹងពាក់បានឡើយ។
នៅពេលនោះ នាងត្រូវខំរស់ដោយខ្លួនឯង ព្រោះស្ថានភាពគ្រួសារ ក៏មិនជាធូរធារដែរ។ទោះយ៉ាងណានៅពេលនោះ ដោយសំអាងលើទេពកោសល្យសិល្បៈចម្រៀងនាងក៏ចេញរកការងារធ្វើ ហើយជាភ័ព្វល្អ នៅខ្ទង់ពាក់កណ្ដាលឆ្នាំ ២០១៧ នាងត្រូវបានថៅកែហាងមួយ ព្រមទទួលយកនាងធ្វើជាតារាចម្រៀងក្នុងហាងរបស់ខ្លួន ហើយពេលនោះ ជីវិតតស៊ូ ជាអ្នករៀនផង ធ្វើការផង ក៏បានចាប់ផ្ដើមឡើង។
ក្រោយពីច្រៀង នៅក្នុងហាង បានមួយរយៈធំ នាងក៏បានឈប់វិញ ហើយក៏បានដាក់ពាក្យប្រឡងក្នុងកម្មវិធីប្រឡងចម្រៀងលំដាប់ថ្នាក់ពិភពលោកThe Voice Cambodiaរដូវកាលទី២ ដោយចូលរួមប្រឡងក្នុងអំឡុងឆ្នាំ២០១៦ ហើយគិតមកទល់នឹងពេលនេះ មានរយៈពេលប្រមាណ៦ឆ្នាំហើយ។
ទោះមិនបានជោគជ័យក្នុងការប្រឡងចម្រៀងនេះក៏ពិតមែន តែរហូតមកដល់ពេលនេះ តន់ ចន្ទសីម៉ា បានក្លាយជាគ្រាប់ពេជ្រដ៏មានតម្លៃរបស់ផលិតកម្មGalaxy Navatra ហើយភាពល្បីល្បាញរបស់នាងមិនចាញ់ម្ចាស់ពានក្នុងកម្មវិធីលំដាប់ថ្នាក់ពិភពលោកមួយនេះឡើយ។
អ្វីដែលគួរឲ្យសរសើរទៀតនោះ ទោះនាងរវល់នឹងការងារសិល្បៈប៉ុណ្ណា ក៏ឆ្លៀតតស៊ូសិក្សារហូតរៀនចប់បរិញ្ញាបត្រជំនាញសេដ្ឋកិច្ច ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ដោយត្រៀមទទួលសញ្ញាប័ត្រ នៅថ្ងៃទី១ ខែវិច្ឆិកា ឆ្នាំ២០២២។
បង្ហោះភ្ជាប់ជាមួយរូបថតឈុតទទួលសញ្ញាប័ត្រ តន់ ចន្ទសីម៉ា បានបញ្ជាក់ថា «ពុកម៉ែបានធ្លាប់ប្រាប់ថា ម៉ែគ្មានអ្វីចែកឱ្យទេ មានតែចំណេះ វិជ្ជាកូនខិតខំណា កូនសូមអរគុណលោកពុកអ្នកម៉ែ ជួបគ្នាថ្ងៃ1 ខែ វិច្ឆិកា ឆ្នាំ 2022 OCIC»៕
