ក្រុមជីហាដរដ្ឋឥស្លាមបានបញ្ជាក់ពីការស្លាប់របស់មេដឹកនាំលោក Abu Bakr al-Baghdadi នៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ហើយបានប្រកាសថា លោក Abu Ibrahim al-Hashimi al-Quraishi ជាអ្នកស្នងតំណែងគាត់។
លោក Abu Hamza al-Quraishi ដែលជាអ្នកនាំពាក្យថ្មីរបស់ក្រុមជីហាដនេះបាននិយាយក្នុងសេចក្តីថ្លែងការណ៍ជាសំឡេងមួយថា “យើងសូមកាន់ទុក្ខចំពោះមេបញ្ជាការដ៏ស្មោះត្រង់”។
លោក Baghdadi ដែលបានដឹកនាំក្រុម IS ចាប់តាំងពីឆ្នាំ២០១៤មកនិងជាមនុស្សដែលគេតាមចាប់បំផុតនៅលើពិភពលោកគឺត្រូវបានសម្លាប់នៅក្នុងការវាយឆ្មក់របស់កងកម្លាំងពិសេសអាមេរិកនៅក្នុងខេត្ត Idlib ភាគពាយព្យប្រទេសស៊ីរីកាលពីថ្ងៃអាទិត្យ។
អ្នកនាំពាក្យក្រុម IS ក៏បានចេញការព្រមានយ៉ាងខ្លាំងដល់សហរដ្ឋអាមេរិកផងដែរបន្ទាប់ពីលោកប្រធានាធិបតី Donald Trump បានប្រកាសអំពីការស្លាប់របស់លោក Baghdadi នៅក្នុងសុន្ទរកថាតាមទូរទស្សន៍ពីសេតវិមាន។
នៅក្នុងសារជាសំឡេង អ្នកនាំពាក្យថ្មីរបស់ក្រុម IS បានហៅលោក Trump ថាជា “មនុស្សចាស់ចម្កួត” ហើយបានព្រមានសហរដ្ឋអាមេរិកថា ក្រុមអ្នកគាំទ្ររបស់ក្រុមនេះនឹងសងសឹកចំពោះការស្លាប់របស់លោក Baghdadi៕
