រយៈពេលប្រមាណ១ខែទៀតប៉ុណ្ណោះ, ពិធីការិនីដ៏ល្បីអ្នកនាង កែវ ចាន់និមល នឹងសម្រាលកូនប្រុសក្នុងផ្ទៃហើយ ហើយកូនប្រុសដំបូងនេះ អ្នកនាង និងស្វាមី បានត្រៀមឈ្មោះសម្រាប់ដាក់ឲ្យគេរួចរាល់អស់ហើយ។
រហូតមកដល់ពេលនេះ ជិតសម្រាលទៅហើយ តែ ពោះ អ្នកនាង កែវ ចាន់និមល មើលទៅដូចអ្នកគ្មានទម្ងន់អញ្ចឹង។ ចំណុចនេះ ត្រូវបានអ្នកគាំទ្រ ឧស្សាហ៍ជជីកសួរអ្នកនាង នៅលើបណ្ដាញសង្គមហ្វេសប៊ុកផងដែរ។
ជុំវិញរឿងនេះ ពិធីការិនី ដែលជាអតីតសាស្ត្រាចារ្យគ្រូបង្រៀនដ៏ឆ្នើមមួយខាងលើ តែងតែប្រាប់ជារឿយៗថា ខ្លួនកាត់ម៉ូតបាំងពោះដើម្បីកុំឲ្យឃើញធំនោះ។ ទោះជាការមើលឃើញបែបនេះពិតមែន តែធាតុពិតពេលនេះ ពោះអ្នកនាង កាន់តែធំ, គីឡូកាន់តែឡើងស្រើតៗ, បាត់បង់សោភ័ណភាពពីមុន តែម្ដង។
អ្នកនាង បានហៅការប្រែប្រួលរបស់ខ្លួនឯង និងអ្នកម្ដាយទាំងអស់ថា ប្រុសៗគ្មានថ្ងៃយល់នោះឡើយ។ បង្ហោះភ្ជាប់ជាមួយរូបថតរបស់ខ្លួនជាច្រើនសន្លឹកនៅព្រឹកថ្ងៃទី៤ ខែវិច្ឆិកា អ្នកនាង កែវ ចាន់និមល បានរៀបរាប់ថា «ការលះបង់របស់ម្តាយគ្រប់រូបអំឡុងពេលពពោះ ប្រុសៗគ្មានថ្ងៃយល់ឡើយ បាត់បង់សម្រស់ ស្បែកស្រអាប់ មុខស្លក់ ធាត់លែងមានរាង…
តែគ្រប់យ៉ាងអោយតែយើងមិនបោះបង់ខ្លួនឯង ហើយរីករាយទទួលនូវអ្វីដែលយើងមាន នោះ អ្នកម្តាយគ្រប់រូបនឹងពេញចិត្តដោយមោទនភាពទោះដឹងថា មិនដូចមុនតែម៉ាក់នៅតែពេញចិត្តរង់ចាំការមកដល់របស់កូន»៕
