អ្នកស្រីទ្រី ដាណា ត្រូវបានគេស្គាល់ច្រើនតាមរយៈសកម្មភាពមនុស្សធម៌ស្ទើរជារៀងរាល់ថ្ងៃ ជាមួយនឹងការកាប់កប់លើមុខជំនួញ មានលុយ មានឡាន មានវិឡារ ជាដើមនោះ។ ទោះយ៉ាងណា អ្នកស្រី មិនសូវមានពេលទំនេរជួបជុំកូនៗដើរលេងកម្សាន្តនោះឡើយ។
ដោយឡែកក្នុងឱកាសឆ្នាំសកលនេះ អ្នកស្រី បានចំណាយពេលវេលានាំកូនៗជាទីស្រឡាញ់របស់ខ្លួនដើរលេងកម្សាន្តទៅប្រទេសម៉ាឡេស៊ី។ បែរជាមកជួបរឿងមួយនេះ ធ្វើឲ្យអ្នកស្រីបានត្រឹមបង្ហោះសារសុំទោសកូន អមដោយស្ទីកឃ័រទឹកភ្នែកប៉ុណ្ណោះ។
បង្ហោះភ្ជាប់ជាមួយរូបថតកូនៗ១សន្លឹកកាលពីយប់ថ្ងៃទី៣១ ខែធ្នូ ឆ្នាំ២០២២ អ្នកស្រី ទ្រី ដាណា បានរៀបរាប់ថា «អោយម៉ាក់សុំទោសកូនៗម៉ាក់ខំជឿលើក្រុមហ៊ុនទេសចរណ៍ថា នាំកូនមកខោនដោនអោយសប្បាយៗ ដឹងអីក្រុមហ៊ុននេះ យកមកទុកដោយអត់មានកម្មវិធីអ្វីទាំងអស់ ម៉ាក់និងប៉េះពូវពេលវេលាអោយកូនៗវិញ អាណិតណាស់
ខ្ញុំនិងបង្ហាញឈ្មោះក្រុមហ៊ុនទេសចរណ៍នេះក្នុងពេលឆាប់ៗនេះ តែលូវសុំពេលលួងកូនៗសិនអាណិតឡើងស្រក់ទឹកភ្នែក»។
ក្រោយមកនៅរាត្រីឆ្លងចូលថ្ងៃទី១ ខែមករា ឆ្នាំ២០២៣ អ្នកស្រី ទ្រី ដាណា បានបង្ហោះសារទៀតថា «ខ្ញុំទុកពេលអោយ24ម៉ោង បើគ្មានដំណោះស្រាយណាសំស្របអោយខ្ញុំទទួលយកបានទេខ្ញុំនិងផុសក្រុមហ៊ុនទេសចរណ៍ដែលបានធ្វើអោយខកនិងរំលោភលើសេចក្តីទុកចិត្តរបស់ខ្ញុំហើយនិងនៅតែត្រូវដោះស្រាយដដែល លុះត្រាតែមានដំណោះស្រាយដែលខ្ញុំអាចទទួលយកបាន»។
នៅពេលឃើញបែបនេះ អ្នកគាំទ្រក៏បានសួរនាំពីការចំណាយ ថៅកែងហាងពេជ្រចិត្តធម៌រូបនេះ ក៏ឆ្លើយតបថា «តិចទេ តែជាង១ម៉ឺនទេ តែខឹងចិត្ត ចាញ់បោកគេ»។ រហូតមកដល់ពេលនេះ មិនដឹងថា ក្រុមហ៊ុននោះមានដំណោះស្រាយហើយឬយ៉ាងណាទេ។ តែមុននេះអ្នកស្រីបានបង្ហោះរូបជាមួយកូនៗ ហើយពោលពាក្យថា«ថ្ងៃទី១នៃឆ្នាំ2023 ឃើញស្នាមញញឹមកូនៗគឺក្តីសុខរបស់ម្តាយ»៕
