នាយពែកមីជាតារាកំប្លែងដ៏ល្បីម្នាក់នៅកម្ពុជា មានបងប្អូនបង្កើត២នាក់ ដែលដើរតាមគន្លងរបស់ខ្លួនក្នុងវិថីសិល្បៈ គឺនាយ គ្រឿន និងនាយ ក្រាន់ ដោយពួកគេសុទ្ធសឹងតែវិវឌ្ឍចេញពីកម្មករធ្វើសំណង់ដូចគ្នា។
និយាយពីនាយក្រាន់ ដែលជាប្អូនប្រុសពៅរបស់នាយពែកមីនោះ មិនត្រឹមតែមានសមត្ថភាពក្នុងការសម្ដែងនោះទេ រូបគេ ថែមទាំងមានសមត្ថភាពច្រៀងដូចទៅនឹងតារាចម្រៀងអាជីពអញ្ចឹង ជាហេតុធ្វើឲ្យអ្នកគាំទ្រ តែងតែលាន់មាត់សរសើរ។
ជាក់ស្ដែង កាលពីពេលថ្មីៗកន្លងទៅនេះ នៅក្នុងកម្មវិធី «អ្នកជិតខាង» នាយក្រាន់ បានបង្ហើរសំនៀងមួយបទមានចំណងជើងថា «ចាំចម្លើយ» ជាសំនៀងដើមរបស់ លោក ដួង វីរៈសិទ្ធ ចេញពីលើអាកាស យ៉ាងពីរោះរណ្ដំស្ដាប់ហើយ ឡើងអន្លង់អន្លោចតែម្ដង។
អ្វីជាការចាប់អារម្មណ៍មុននឹងបង្ហើរសំនៀងខាងលើ នាយក្រាន់ បានបង្ហាញអារម្មណ៍ស្ដាយក្រោយ ដែលឈប់ធ្វើសំណង់មកធ្វើជាអ្នកកំប្លែង។ នាយក្រាន់ បានបញ្ជាក់ថា ពេលធ្វើសំណង់ដំបូងនោះ, លោកទទួលបានប្រាក់កម្រៃ១ថ្ងៃ ៦ទៅ៧ពាន់រៀលអីទេ។
លោកបន្តថា ពេលឈប់ធ្វើសំណង់ មកលេងកំប្លែងដំបូង ទទួលបានលុយ ១០ ទៅ២០ដុល្លារ។ តែរហូតមកដល់ពេលនេះ លោកនៅតែទទួលបានប្រាក់ពីការលេងកំប្លែង ១០ ទៅ២០ដុល្លារដដែល ខណៈអ្នកធ្វើសំណង់ឡើងបាន៣០ដុល្លារហើយ ក្នុង១ថ្ងៃ។
នាយក្រាន់ បញ្ជាក់ទៀតថា បើសិននាយ នៅធ្វើសំណង់ អាចឡើងបាន៥០ ទៅ៦០ដុល្លារ។ បន្ថែមលើនេះ នាយក្រាន់ បានបន្តពាក់ព័ន្ធទៅនឹងការងារលេងកំប្លែងថា បើសិនជា នាយទៅលេងជាមួយ បងខ្លួន នាយពែកមី បានលុយ៥០ដុល្លារ ចែកគ្នា២នាក់ អាប៉ូយ ស្មើគ្នាទៀត៕ ដើម្បីជ្រាបច្បាស់ សូមទស្សនាវីដេអូ ខាងក្រោមនេះ ៖
