ស្វាយរៀង ៖ កាលពីពេលថ្មីៗកន្លងទៅនេះ អ្នកលេងបណ្ដាញសង្គមហ្វេសប៊ុក, លោកគ្រូ អ្នកគ្រូ និង និស្សិតមួយចំនួន បានសម្រក់ទឹកភ្នែកស្ទើរគ្រប់គ្នា ក្រោយឃើញទិដ្ឋភាព ឪពុកម្តាយមកទទួលសញ្ញាបត្រជំនួសកូនប្រុសរបស់ខ្លួន ជាសិស្សពូកែ ដែលបានបាត់បង់ជីវិតនោះ។
ជាក់ស្ដែង, គណនីហ្វេសប៊ុកឈ្មោះ Sam Thavy បានសរសេររៀបរាប់កាលពីថ្ងៃទី៣០ ខែមករាឆ្នាំ ២០២៣ បង្ហាញអារម្មណ៍ដូច្នេះថា «វាជាអារម្មណ៍ខ្លោចផ្សាសោកសង្រេងបំផុត ប្រសិនបើអ្នកទាំងអស់គ្នានៅក្នុងហេ,,តុការណ៍មួយនេះ គឺនៅពេលដែលឪពុកម្តាយ និស្សិត និងជាយុវជនស្ម័គ្រចិត្តអង្គរសង្ក្រាន្តឈរជើងនៅគោលដៅលានជល់ដំរីមកទទួលសញ្ញាបត្ររបស់កូនប្រុសជាទីស្រឡាញ់។
ជានិស្សិត ដែលរៀនពូកែចំណាត់ថ្នាក់លេខ ១ថ្នាក់គណិតវិទ្យា ស្លូតបូត តស៊ូរៀនសូត្រទោះបីជីវភាពលំបាកយ៉ាងណាក្តី។ ជាតិនេះសន្ធាអាយុខ្លីចាកចេញទៅដោយបន្សល់ទុកនូវអំពើល្អជាច្រើន ជាតិក្រោយសូមប្អូនអាយុវែង។
ថ្នាក់ដឹកនាំ លោកគ្រូអ្នកគ្រូ គ្រប់គ្នាស្រក់ទឹកភ្នែក ខ្ញុំនឹកគ្រប់អនុស្សាវរីយ៍ ដែលដឹកនាំ និងរួមការងារជាមួយសន្ធាមិនថា ការងារសង្ក្រាន្ត ឬការងារនៅសាកលវិទ្យាល័យស្វាយរៀង។ ធាអើយ។ កូនអើយគេមកទទួលទាំងអស់បាត់តែកូនម៉ែ។ កូនអើយម៉ែមកទទួលសញ្ញាបត្រឲ្យកូនហើយ។ ម៉ែ នឹងយកទៅធ្វើបុណ្យដាក់វាឲ្យកូន ធាអើយ!
ជាមួយគ្នានេះ គណនីហ្វេសប៊ុកមួយទៀត ឈ្មោះ « Sovann Sok» បានសរសេររៀបរាប់យ៉ាងរំជួលចិត្តដែរថា «អនិច្ចាសង្ខារមិនទៀង។ អ្នកមានគុណទាំងទ្វេតស៊ូអោយកូនបានរៀនចប់ដោយជោគជ័យ ប៉ុន្តែ មច្ចុរាជបានមកយកជីវិតកូនមុនថ្ងៃទទួលសញ្ញាបត្រ ទុកអោយឪពុកម្តាយទួញយំស្រណោះកូនពន់ពេក។ ទំនួញម្ដាយ ៖ កូនអើយ ម៉ែមកទទួលសញ្ញាបត្រជូនកូនហើយ!»៕
