នៅមុនទៅប្រកួតលើសង្វៀន Thai Fight នោះ, កីឡាករ ព្រំ សំណាង បានបង្ហាញភាពជឿជាក់ និងប្តេជ្ញាថា នឹងធ្វើឱ្យបានល្អសម្រាប់ការប្រកួតដំបូងរបស់ខ្លួន ពេលត្រូវជួបកីឡាករជនជាតិអង់គ្លេស Thomas Capenter នោះ។
ដូចការប្ដេជ្ញាចិត្ត, ទីបំផុត ជាងកាត់សក់ដៃឯករូបនេះ បានយកឈ្នះកីឡាករជនជាតិអង់គ្លេស Thomas Capenter ត្រឹមទឹកទី១ប៉ុណ្ណោះ ក្នុងការប្រកួតកាលពីថ្ងៃទី៥ ខែកុម្ភៈ ឆ្នាំ២០២៣។ ក្រោយឈ្នះការប្រកួត កីឡាករគុនខ្មែរជម្រើសជាតិកម្ពុជារូបនេះ បានទទួលការសាទរ និងឧបត្ថម្ភជាបន្តបន្ទាប់។
ទោះយ៉ាងណា មុន ព្រំ សំណាង ចេញទៅប្រកួតនោះ , មានព័ត៌មានដ៏ល្បីមួយ ពាក់ព័ន្ធនឹង ប៊ូខាវ អះអាងថា មិនមែនជាខ្មែរ និងបានប្រាប់អ្នកកាសែតថៃថា «រឿងកម្ពុជាដាក់គុនខ្មែរ នៅស៊ីហ្គេមជាសិទ្ធិរបស់គេ យើងមិនអាចនិយាយបានទេ ហើយគុនខ្មែរ គឺត្រឹមតែលំដាប់អាស៊ាន យើងកុំទៅខ្វល់អី។ យើងត្រូវនិយាយដល់ក្នុងព្រឹត្តិការណ៍អូឡាំពិក ព្រោះរបស់ថៃយើង Original “ លេខ ១ ” ទៅហើយ»។
ប្រការនេះ បានធ្វើឲ្យអ្នកស្នេហាវិស័យកីឡាមួយចំនួនប្រកាសឧបត្ថម្ភថវិកាដល់កីឡាកររូបណា ដែលប្រកួតឈ្នះប៊ូខាវ ជាបន្តបន្ទាប់។ ក្នុងចំណោមអ្នកប្រកាសនេះ ឧកញ៉ា ស្រី ចាន់ថន ត្រូវបានគេចាប់អារម្មណ៍ជាងគេ ដោយលោកប្រកាសឧបត្ថម្ភវិឡារតម្លៃ២៧ម៉ឺនដុល្លារ, ឡាន១ និង ថវិកាបន្ថែមប្រចាំរយៈពេល១០ឆ្នាំនោះ។
ងាកមក ឯកឧត្តម ជុំ កុសល រដ្ឋលេខាធិការក្រសួងព័ត៌មាន ក្រោយទទួលដំណឹងព្រំ សំណាង ប្រកួតឈ្នះបរទេសនៅសង្វៀនThai Fightនោះ, ក៏បានបង្ហោះរូបថត អមដោយសារយ៉ាងទទូចនៅថ្ងៃទី៦ ខែកុម្ភៈថា «កីឡាករព្រំ សំណាងបានឈ្នះគូប្រកួតកំរិតពិភពលោកហើយ អាចនិយាយបានថាគាត់( ព្រំ សំណាង)គឺជាកីឡាករគុនខ្មែរមួយរូបដែលមានសក្តានុពល និងមានក្តីសង្ឃឹមខ្ពស់ក្នុងការដណ្តើមមេដាយមាសជូនជាតិក្នុងព្រឹត្តិការណ៍ស៊ីហ្គេមខាងមុខនេះ ។
ដូច្នេះ ស្នើសុំដល់បងប្អូនទាំងឡាយដែលបានប្រកាសថានឹងផ្តល់ប្រាក់រង្វាន់ជាច្រើនចំពោះកីឡាកររូបណាប្រកួតឈ្នះ បូខាវ នោះ សូមបង្វែរមកជួយជ្រោមជ្រែងដល់កីឡាករព្រំ សំណាងវិញ ដើម្បីមានលទ្ធភាពគ្រប់គ្រាន់ក្នុុងហ្វឹកហាត់បន្ថែមឲ្យកាន់តែបានល្អថែមទៀត៕»៕
