ក្រុមមន្ត្រីបាននិយាយថា មនុស្សយ៉ាងតិច៦នាក់ត្រូវបានសម្លាប់នៅពេលក្រុមអ្នកតវ៉ាដែលខឹងសម្បានឹងការចែកចាយជំនួយស្បៀងអាហារមិនស្មើគ្នាបានប៉ះទង្គិចជាមួយកងកម្លាំងសន្តិសុខនៅភាគខាងលិចប្រទេសអាហ្វហ្គានីស្ថាន។
អំពើហិង្សានេះបានកើតឡើងបន្ទាប់ពីក្រុមបាតុករបានប្រមូលផ្តុំគ្នានៅទីក្រុង Firozkoh នៃខេត្ត Ghor ដើម្បីតវ៉ាអំពីការខកខានមិនបានជួយដល់ជនក្រីក្រក្នុងអំឡុងពេលមានជំងឺរាតត្បាត។
ក្រសួងមហាផ្ទៃបាននិយាយថា ខ្មាន់កាំភ្លើងនៅក្នុងហ្វូងមនុស្សបានវាយប្រហារការិយាល័យរដ្ឋាភិបាលដែលជាហេតុជំរុញឲ្យកងកម្លាំងសន្តិសុខបើកការបាញ់ប្រហារ។
ប៉ូលិស២នាក់និងជនស៊ីវិល៤នាក់បានស្លាប់។
ក្រសួងមហាផ្ទៃបានបន្តថា ជនស៊ីវិល៩នាក់និងប៉ូលិស១០នាក់ក៏បានរងរបួសផងដែរ។
ស្របពេលជាមួយគ្នានោះ អង្គការលើកលែងទោសអន្តរជាតិបានអំពាវនាវឲ្យមានការស៊ើបអង្កេតឯករាជ្យនិងប្រកបដោយប្រសិទ្ធិភាពមួយទៅលើអ្វីដែលខ្លួនបាននិយាយថាជា “ការប្រើប្រាស់កម្លាំងដែលមិនចាំបាច់និងហួសហេតុ” ដែលនាំទៅដល់ការស្លាប់ជនស៊ីវិល៕
