ក្រុមមន្ត្រីបាននិយាយថា ពលករចំណាកស្រុកឥណ្ឌាយ៉ាងតិច៣០នាក់បានស្លាប់កាលពីថ្ងៃសៅរ៍នៅក្នុងគ្រោះថ្នាក់ចរាចរណ៍ពីរករណីផ្សេងគ្នាខណៈពួកគេកំពុងវិលត្រឡប់ទៅស្រុកកំណើតវិញអំឡុងការបិទប្រទេសដោយសារវីរុសកូរ៉ូណា។
គ្រោះថ្នាក់នៅភាគកណ្តាលនិងភាគខាងជើងប្រទេសឥណ្ឌាទាំងពីរករណីនេះគឺជាព្រឹត្តិការណ៍ចុងក្រោយបង្អស់ដែលពាក់ព័ន្ធនឹងកម្មកររាប់លាននាក់ដែលត្រូវបានគេទុកចោលនិងគ្មានការងារធ្វើដោយការបិទប្រទេសរយៈពេល៧សប្តាហ៍។
មន្ត្រីមូលដ្ឋានឈ្មោះ Abishek Singh បានប្រាប់ AFP ថា នៅក្នុងគ្រោះថ្នាក់សម្លាប់មនុស្សច្រើនបំផុត រថយន្តដឹកកម្មករប្រហែល៤០នាក់បានបុករថយន្តមួយគ្រឿងទៀតដែលដឹកកម្មករនិងក្រុមគ្រួសាររបស់ពួកគេដែលចតនៅតូបលក់កាហ្វេតាមចិញ្ចើមផ្លូវក្នុងរដ្ឋ Uttar Pradesh។
លោក Singh បាននិយាយថា អ្នកបើកបររថយន្តបានដេកលក់។
ស្របពេលជាមួយគ្នានោះ មន្ត្រីក្នុងតំបន់ឈ្មោះ Shashi Mishra បាននិយាយថា អ្នកបើកបរស្រវឹងស្រាត្រូវបានគេស្តីបន្ទោសចំពោះឧប្បត្តិហេតុទី២នៅរដ្ឋ Madhya Pradesh នៅពេលរថយន្តដឹកកម្មករដែលត្រឡប់មកពីរដ្ឋ Maharashtra បានក្រឡាប់។
លោកបន្ថែមថា មនុស្សចំនួន៤នាក់ក្នុងចំណោមអ្នកស្លាប់ទាំង៥នាក់គឺជាស្ត្រីនិងមនុស្ស១៧នាក់បានរងរបួស៕
