អង្គការសុខភាពពិភពលោកបាននិយាយកាលពីថ្ងៃចន្ទថា ការពិនិត្យឯករាជ្យលើការឆ្លើយតបវីរុសកូរ៉ូណានឹងចាប់ផ្តើមក្នុងពេលឆាប់ៗតាមដែលអាចធ្វើទៅបានហើយអង្គការនេះបានទទួលការគាំទ្រនិងការសន្យាផ្តល់ថវិកាយ៉ាងច្រើនពីប្រទេសចិនដែលជាប្រភពដើមនៃជំងឺរាតត្បាត។
ប៉ុន្តែអ្នករិះគន់ WHO ធំជាងគេគឺរដ្ឋបាលសហរដ្ឋអាមេរិករបស់លោកប្រធានាធិបតី Donald Trump បានស្តីបន្ទោសចំពោះការប៉ុនប៉ងយ៉ាងជាក់ស្តែងដើម្បីលាក់បាំងការផ្ទុះឡើងនៃជំងឺនេះដោយរដ្ឋជាសមាជិកមួយ។
ក្រោយមកលោក Trump បានហៅ WHO ថាជាអាយ៉ងចិននិងបាននិយាយនៅទីក្រុងវ៉ាស៊ីនតោនថា WHO បានធ្វើការងារដ៏គួរឲ្យសោកស្តាយបំផុតក្នុងការដោះស្រាយបញ្ហាវីរុសនេះហើយលោកនឹងធ្វើការសម្រេចចិត្តអំពីការផ្តល់ថវិការបស់សហរដ្ឋអាមេរិកដល់ស្ថាប័នមួយនេះក្នុងពេលឆាប់ៗ។
លោក Trump បានប្រាប់អ្នកយកព័ត៌មានក្នុងព្រឹត្តិការណ៍មួយនៅសេតវិមានថា “សហរដ្ឋអាមេរិកបានបង់លុយឲ្យពួកគេចំនួន៤៥០លានដុល្លារក្នុងមួយឆ្នាំ។ ចិនបានចំណាយប្រាក់ដល់ពួកគេចំនួន៣៨លានដុល្លារក្នុងមួយឆ្នាំ។ ហើយពួកគេគឺជាអាយ៉ងរបស់ប្រទេសចិន”។
គួរបញ្ជាក់ថា លោក Trump បានផ្អាកការផ្តល់មូលនិធិរបស់សហរដ្ឋអាមេរិកដល់ WHO រួចទៅហើយបន្ទាប់ពីបានចោទប្រកាន់អង្គការនេះថាមានទំនោរទៅលើប្រទេសចិនហើយនៅពេលដំណាលគ្នានេះបានដឹកនាំការរិះគន់ជាអន្តរជាតិចំពោះទីក្រុងប៉េកាំងជុំវិញកង្វះតម្លាភាពនៅដំណាក់កាលដំបូងនៃវិបត្តិ៕
