បុរសម្នាក់នៅភូមិ Durian ក្នុងស្រុក Pantai Labu នៃតំបន់ Deli Serdang ខេត្តស៊ូម៉ាត្រាខាងជើងត្រូវបានគេប្រទះឃើញឆក់ស្លាប់ដោយសារចុចទូរស័ព្ទបណ្តើរសាកថ្មបណ្តើរ។
បុរសដែលត្រូវបានគេស្គាល់ឈ្មោះថា Abdul Haris ត្រូវបានបញ្ចុះកាលពីថ្ងៃសៅរ៍បន្ទាប់ពីគ្រួសាររបស់គាត់បានបដិសេធការធ្វើកោសល្យវិច័យ។
ម្តាយរបស់គាត់ឈ្មោះ Hamisah Purba បាននិយាយថា លោក Abdul ត្រូវបានគេប្រទះឃើញដេកស្លាប់នៅលើគ្រែក្បែរទូរស័ព្ទរបស់គាត់ដែលមានដោតឆ្នាំសាក។
លោកស្រី Hamisah បាននិយាយកាលពីថ្ងៃសៅរ៍ថា “ខ្ញុំបានលឺសំលេងរបស់គាត់ស្រែកហើយពេលខ្ញុំទៅមើលគាត់ គាត់បានស្លាប់បាត់ទៅហើយ”។
ប៉ូលិសមូលដ្ឋានលោក Adj. Comr. MKL Tobing បាននិយាយថា ឧប្បត្តិហេតុនេះបានកើតឡើងកាលពីថ្ងៃសុក្រ។ ប៉ូលិសសង្ស័យថា លោក Abdul បានស្លាប់ដោយសារឆក់ខ្សែភ្លើងពេលកំពុងប្រើទូរស័ព្ទរបស់គាត់ជាមួយកាសស្តាប់ត្រចៀកពេលកំពុងសាកថ្ម។
លោក Tobing បាននិយាយទៀតថា ប៉ូលិសបានដកហូតទូរស័ព្ទចល័តនិងកាសស្តាប់ត្រចៀកជាភស្តុតាង។ ទោះបីជាយ៉ាងណាក៏ដោយ ប៉ូលិសបានប្រកាសថា ការស្លាប់របស់គាត់គឺជាឧប្បត្តិហេតុហើយនឹងមិនបន្តការស៊ើបអង្កេតឡើយ៕
