អស់រយៈពេលប្រមាណជិត៣ឆ្នាំមកហើយ ដែលតារាចម្រៀងនិយមម៉ូតសក់គ្របត្រចៀកលោក អាន វិសាល បានបាត់វត្តមាននៅតាមកញ្ចក់ទូរទស្សន៍ ឬកម្មវិធីនានាលើឆាកតន្ត្រី។ តែថ្មីៗនេះ ស្រាប់តែលោក បានសាងភាពភ្ញាក់ផ្អើលសម្រាប់អ្នកគាំទ្រតែម្ដង។
គេនៅចាំបានថា កាលពីអំឡុងឆ្នាំ ២០១៨-២០១៩ អាន វិសាល នៅតែបន្តឡើងច្រៀងលើឆាកម្តងម្កាល ប៉ុន្តែក្រោយធ្លាយរឿងអាស្រូវត្រូវក្មេងស្ទាវវា.យរបួ.សក្បាលធ្ងន់ធ្ងរ តារាចម្រៀងរូបនេះក៏បានបាត់ដំណឹងសូន្យឈឹងតែម្ដង។
បើទោះជាយ៉ាងណាថ្មីៗនេះ លោក អាន វិសាល ត្រូវបានគេទម្លាយថា កំពុងតែប្រើប្រាស់ជីវិតយ៉ាងសាមញ្ញាបំផុត ជាមួយនឹងមុខរបរប្រចាំថ្ងៃមួយ នៅម្ដុំបឹងកេងកង២ ក្នុងរាជធានីភ្នំពេញ។
លោក អាន វិសាល ត្រូវបានគេឱ្យដឹងថា កំពុងបើកហាងលក់នំបញ្ចុក និងភោជនីដ្ឋានលក្ខណៈហូបចុកធម្មតាមួយ ដែលមានលក់ដូចជាគ្រឿងក្លែមជាដើម។ តែដោយការរាតត្បាតនៃជំងឺកូវីដ ១៩ អាន វិសាល ក៏ជួបនូវបញ្ហាមួយចំនួន និងបានបង្កើនការលក់គ្រឿងក្លែម និងអាហារផ្សេងៗតាមអនឡាញវិញ ដែលពេលនេះកំពុងកាក់កបគួរសម។
ជាក់ស្ដែង ក្នុងកិច្ចសម្ភាសន៍មួយ លោកអាន វិសាល បាននិយាយរៀបរាប់ពីជីវិតកម្សត់តស៊ូរស់នៅផ្ទះជួលរបស់លោក ក្រោយពេលឃ្លាតចាកឆ្ងាយពីវិស័យសិល្ប: និងប្រាប់ពីជីវភាពក្នុងកំឡុងពេលកូវីដផងដែរ។
លោក បានបញ្ជាក់ដូច្នេះថា «នៅក្នុងកំឡុងកូវីដហ្នឹងខ្ញុំបង្ហោះម្ហូប ហើយមានប្អូនប្រុសម្នាក់ខមិនសួរ ហើយកាលពីពេលមុនហ្នឹងខ្ញុំអត់មានទូរស័ព្ទប្រើទេ សួរថាបងៗឯងធ្វើលក់មែន ហ្នឹងហើយធ្វើលក់ឲ្យគេ ទឹកគ្រឿងមួយឈុតហ្នឹងបាន៣ម៉ឺន…. បន្ទាប់មកខ្ញុំក៏ជិះកាត់ផ្សារបឹងព្រលិតឃើញគេលក់ត្រី ហើយនិយាយឲ្យអស់ទៅពេលហ្នឹងខ្ញុំក៏សុំទិញត្រីយកទៅលក់ត រួចមកក៏ប្រលាក់លក់ត្រីខ្លួនឯង រួចក៏បែកគំនិតលក់ម្ហូបខ្មែរដល់ខ្ញុំមានហាងមកដល់សព្វថ្ងៃ…»។
គួរបញ្ជាក់ថា លោក អាន វិសាល គឺជាតារាចម្រៀងមួយរូបដែលទទួលបានប្រជាប្រិយភាព និងពេញនិយមខ្លាំងសម្រាប់ស្រទាប់យុវវ័យ។ លោក អាន វិសាល ក៏ជាតារាចម្រៀងម្នាក់ ដែលបានបោះជំហានដំបូងគេក្នុងផលិតកម្ម CB តាមរយៈបទ «ទឹកភ្នែកខ្ទើយ» ហើយលោកក៏ធ្លាប់ជាតារាចម្រៀងប្រចាំផលិតកម្ម M ផងដែរ៕
