ស្ត្រីម្នាក់ត្រូវបានចាប់ខ្លួនបន្ទាប់ពីបំពុលកូនប្រុសអាយុ២ឆ្នាំរបស់នាងហើយធ្វើល្បិចបរិច្ចាគតាមអនឡាញដើម្បីព្យាបាលជំងឺកូនប្រុសរបស់នាង។
លោកស្រី Supatcha Sutthiphol អគ្គនាយកនៃនាយកដ្ឋានកុមារនិងយុវជននៃក្រសួងអភិវឌ្ឍន៍សង្គមនិងសន្តិសុខមនុស្សបាននិយាយថា ប៉ូលិសមកពីអង្គភាពបង្ក្រាបបទឧក្រិដ្ឋបានចាប់ខ្លួនស្ត្រីអាយុ២៩ឆ្នាំម្នាក់កាលពីថ្ងៃទី១៨ខែឧសភាពីបទឆបោកនិងធ្វើឲ្យក្មេងម្នាក់មានរបួសយ៉ាងធ្ងន់ធ្ងរនៅឯផ្ទះរបស់នាងក្នុងសង្កាត់ Don Muang នៃទីក្រុងបាងកក។
លោកស្រីបាននិយាយថា “ជនសង្ស័យបានសារភាពថា កូនប្រុសអាយុ២ឆ្នាំរបស់នាងបានសម្រាកនៅមន្ទីរពេទ្យដោយអះអាងថា គាត់មានអាលែហ្ស៊ីទៅនឹងអាហារសមុទ្រ។ វេជ្ជបណ្ឌិតមិនបានរកឃើញថាមានប្រតិកម្មអាលែហ្ស៊ីទេប៉ុន្តែបានរកឃើញដាននៃសារធាតុគីមីពុលនៅក្នុងមាត់ ក្រពះនិងពោះវៀនរបស់ក្មេងប្រុសដែលក្អួតចង្អោរយ៉ាងខ្លាំង”។
បុគ្គលិកមន្ទីរពេទ្យបានពិនិត្យកំណត់ត្រារបស់ពួកគេហើយបានរកឃើញថា ស្ត្រីរូបនេះធ្លាប់បាននាំក្មេងស្រីអាយុ៤ឆ្នាំម្នាក់ទៅកាន់មន្ទីរពេទ្យដោយអះអាងថា វាជាកូនស្រីរបស់គាត់ហើយមានអាការៈស្រដៀងនឹងក្មេងប្រុសនេះដែរ។ នៅពេលដែលក្មេងស្រីបានស្លាប់ទៅ ក្រុមមន្ត្រីបានរកឃើញថា ស្ត្រីនោះមិនមែនជាម្តាយពិតរបស់នាងទេខណៈដែលសំបុត្រកំណើតរបស់ក្មេងស្រីបានចុះបញ្ជីប្តីប្រពន្ធផ្សេង។
លោកស្រី Supatcha បាននិយាយថា “ការស៊ើបអង្កេតបឋមបានបង្ហាញថា ស្ត្រីរូបនេះបានប្តូរឈ្មោះរបស់គាត់ចំនួនបួនដងរួចមកហើយហើយបានបង្ហោះលើបណ្តាញសង្គមដោយស្នើសុំប្រាក់ដើម្បីព្យាបាលកូនរបស់គាត់”។
ក្មេងប្រុសដែលឥឡូវនេះមិនមានគ្រោះថ្នាក់ដល់ជីវិតគឺនឹងត្រូវសម្រាកក្នុងមន្ទីរយ៉ាងតិច៦ខែ៕
