អគ្គលេខាធិការលោក Antonio Guterres កាលពីថ្ងៃសុក្របានប្រកាសអំពីការស្លាប់របស់កងថែរក្សាសន្តិភាពពីរនាក់ដំបូងរបស់អង្គការសហប្រជាជាតិដោយសារជំងឺ COVID-19។
លោកបានធ្វើការប្រកាសបែបនេះនៅក្នុងពិធីមួយដែលប្រារព្ធទិវាអន្តរជាតិនៃកងរក្សាសន្តិភាព UN ដោយនិយាយថា កងរក្សាសន្តិភាពដែលបានទទួលមរណភាពទាំងពីរនាក់កាលពីថ្ងៃព្រហស្បតិ៍និងថ្ងៃសុក្រគឺកំពុងបម្រើការនៅក្នុងប្រទេសម៉ាលី។ UN និយាយថា ម្នាក់គឺមកពីប្រទេសកម្ពុជានិងម្នាក់ទៀតមកពីប្រទេសអែលសាល់វ៉ាឌ័រ។
លោក Guterres និយាយទៀតថា ជំងឺរាតត្បាតនេះបានផ្លាស់ប្តូរស្ទើរតែគ្រប់យ៉ាងប៉ុន្តែមិនបានផ្លាស់ប្តូរសេវាកម្ម ការពលីនិងភាពមិនអាត្មានិយមរបស់បុរសនិងស្ត្រីជាង៩៥,០០០នាក់ដែលកំពុងបម្រើការក្នុងបេសកកម្មថែរក្សាសន្តិភាពចំនួន១៣បេសកកម្មនៅជុំវិញពិភពលោកទេ។
យោងតាមនាយកដ្ឋានថែរក្សាសន្តិភាព UN បានឲ្យដឹងថា មានករណីជំងឺ COVID-19 ចំនួន១៣៧ករណីដែលត្រូវបានបញ្ជាក់នៅក្នុងប្រតិបត្តិការរក្សាសន្តិភាពរបស់ UN ដែលគិតត្រឹមពេលនេះ ករណីច្រើនបំផុតគឺនៅក្នុងប្រទេសម៉ាលីដែលមាន៩០ករណី៕
