លោក​ជំទាវ ​ឱ វណ្ណឌី​ន ​បញ្ជាក់​ច្បាស់​ៗ​ថា ករណី​គ្រូ​បង្រៀន​ស្លាប់​ មិនមែន​ដោយសារ​​វ៉ាក់សាំង​​​ទេ ដោយសារតែ… (មានវីដេអូ)

កាលពី​ព្រលប់​ថ្ងៃទី​១៧ ខែកុម្ភៈ ឆ្នាំ​២០២១ គណនី​ហ្វេ​ស​ប៊ុ​កមួយ​ឈ្មោះ «Hai Khmerkrom» បាន​បង្ហោះ​រូបថត​គ្រូបង្រៀន​ម្នាក់​បាត់បង់​ជីវិត ហើយ​ប្រាប់​ឲ្យ​ប្រជាជន​ខ្មែរ​ពិចារណា មុននឹង​សម្រេចចិត្ត​ចាក់​វ៉ាក់សាំង​របស់​ចិន​នោះ។

គណនី​ហ្វេ​ស​ប៊ុ​ក​នេះ បាន​បង្ហោះ​សារ​ដូច្នេះ​ថា «​សូម​ប្រជាជន​ខ្មែរ​ធ្វើការ​ពិចារណា​មុននឹង​ចាក់​វ៉ាក់សាំង​ចិន ” អ្នកគ្រូ​ទទួលមរណភាព​ហើយ ” 17/02/2021​អ្នកគ្រូ​ស្លូត សុភាព ជា​ជន​គំរូ បង្រៀន​សិស្ស​យ៉ាង​ល្អ បែរជា​ទទួលមរណភាព​ដោយសារ​ចាក់​វ៉ាក់សាំង​បង្ការ ជំងឺ​កូ​វិដ Sinnorfarm របស់​ចិន​បាន​២​ថ្ងៃ​។ ជាការ​បាត់បង់​ធនធានមនុស្ស ដ៏​សំខាន់ ផ្នែក​បណ្ដុះបណ្ដាល​។​( អ្នកគ្រូ ឆន ណា​រី អាយុ​21​ឆ្នាំ នៅ​ខេត្តក្រចេះ )គួរ​ឲ្យ​សោកស្ដាយ​ពន់ពេក​ហើយ​»​។​

គេ​សង្កេតឃើញថា ក្រោយ​ការ​បង្ហោះ​ត្រឹម​រយៈពេល​២​ម៉ោង​ប៉ុណ្ណោះ គិត​ត្រឹម​ម៉ោង​១០​និង​២៨​នាទី​យប់​ថ្ងៃ​ដដែល​នេះ មានការ​ចាប់អារម្មណ៍​ជាខ្លាំង ដោយ​គ្រាន់តែ​អ្នក​React ជា​មេដៃ​បេះដូង​រហូតដល់​ជាង​៤​ពាន់​, បញ្ចេញមតិ​ជិត​២​ពាន់ និង​ចែករំលែក​បន្ត​រហូតដល់​ជាង​៣​ម៉ឺន​ដង។

ជុំវិញ​ករណីនេះ លោកជំទាវ​វេជ្ជបណ្ឌិត ឱ វណ្ណឌី​ន រដ្ឋលេខាធិការ និង​ជា​អ្នកនាំពាក្យ​ក្រសួងសុខាភិបាល​កម្ពុជា បានចេញ​សារ​បដិសេធ នៅ​យប់​ថ្ងៃ​ដដែល​នេះ ដោយ​បញ្ជាក់ថា អ្នកគ្រូ​រូបនេះ បាត់បង់​ជីវិត ដោយសារ​ជំងឺ​ផ្សេង ហើយ​រហូតមក​ដល់ពេលនេះ ក៏​មិនទាន់មាន​គ្រូបង្រៀន​ណា​ម្នាក់ ចាក់​វ៉ាក់សាំង​នេះ នៅឡើយ​ទេ។

លោកជំទាវ​វេជ្ជបណ្ឌិត បានបញ្ជាក់​ដូច្នេះ​ថា «​សូម​អនុញ្ញាត​ជម្រាបជូន​ផងដែរ ក្រសួងសុខាភិបាល សូម​ធ្វើការ​ច្រានចោល​ទាំងស្រុង​នូវ​ការ​ចុះផ្សាយ ដោយ​មានការ​ប្រឌិត​នូវ​ករណី​នេះ ហើយ​តាម​ព័ត៌មាន ដែល​ក្រសួង​ទទួល​បាន គឺ​គាត់​មាន​ជំងឺ​រលាកស្រោមខួរ​ក្បាល​ធ្ងន់ធ្ងរ ដែល​ក្រុមគ្រូពេទ្យ​ខិតខំ​ជួយសង្គ្រោះ​មិនបាន​»​។​

លោកជំទាវ បន្ថែម​ថា «​ចឹ​ង​ក្រសួងសុខាភិបាល​សូម​ចូលរួម​ចែករំលែក​មរណទុក្ខ ជាមួយ​ក្រុមគ្រួសារ​សព ហើយក៏​សូម​អាជ្ញាធរ​មាន​សមត្ថកិច្ច​មេត្តា​ជួយ​ចាត់ការ​តាម​ផ្លូវ​ច្បាប់​ទៅលើ​ការ​បំផុស​ប្រឌិត​នូវ​ព័ត៌មាន​នេះ ហើយ​ដូច​មានការ​បញ្ជាក់​នៅ​លើ​អត្ថបទ​ហើយ គឺ​មក​ទល់​ពេល​នេះ ការ​ចាក់​វាក់​សាំង​កូវីដ​១៩ មិន​ទាន់​បាន​ផ្ដល់ជូន​ទៅដល់​ក្រុម​គ្រូបង្រៀន​នៅឡើយ​ទេ មានន័យថា មិន​ទាន់​មាន​គ្រូបង្រៀន​ណា​ម្នាក់ ដែល​បាន​ចាក់​វ៉ាក់សាំង​ហ្នឹង​នៅឡើយ​ទេ​»៕


Related posts

Leave a Comment