ជាការពិតណាស់ នៅលើលោកនេះ គ្មានកូនណាមិនស្រឡាញ់ឪពុកម្ដាយរបស់ខ្លួន ហើយក៏គ្មានឪពុកម្ដាយណា មិនស្រឡាញ់កូននោះដែរ។ ទោះពេលខ្លះឪពុកម្ដាយមួយចំនួនតូចរស់នៅមិនចុះសម្រុងគ្នា រហូតឈានដល់ការបែបបាក់ក៏ដោយ តែពួកគេ ក៏មិនចោលតួនាទីជាឪពុកម្ដាយល្អនោះដែរ។
ជាក់ស្ដែង លោកយឹម តាស្រង់ ដែលជាកវីនិពន្ធដ៏ល្បីមួយរូប បានលែងលះជាមួយប្រពន្ធអស់រយៈពេលជាច្រើនឆ្នាំមកហើយ ហើយចំណងស្នេហ៍របស់ពួកគេកន្លងមកនោះ បានបន្សល់ទុកនូវកូនរហូតដល់ទៅ៤នាក់ឯណោះ។
ទោះបែបនេះក្ដី លោកយឹម តាស្រង់ នៅតែដើរតួនាទីជាឪពុកល្អដដែល ដោយលោក បានទទួលរ៉ាប់រងលើការចិញ្ចឹមកូនប្រុសទាំង៤ឲ្យទទួលបានការសិក្សារៀនសូត្រនៅសាលាល្អៗ ហើយឧស្សាហ៍បង្ហាញក្ដីស្រឡាញ់ចំពោះកូនផងដែរ។ ចំណែកអតីតភរិយារបស់លោក ប្រើប្រាស់គណនីហ្វេសប៊ុកឈ្មោះ«Oun Sokun» ក៏ចិញ្ចឹមបីបាច់កូនទាំង៤របស់ខ្លួនបានល្អផងដែរ ហើយរក្សាឈ្មោះជាស្ត្រីមេម៉ាយរហូតដល់សព្វថ្ងៃ។
លោកយឹម តាស្រង់ នៅព្រលប់ថ្ងៃទី១៧ ខែកុម្ភៈ ឆ្នាំ២០២១ម្សិលមិញនេះ បានបង្ហោះក្រដាសចំនួន២សន្លឹក ភ្ជាប់ជាមួយសារដ៏គួរឲ្យសរសើរថា «ខ្ញុំរើក្រដាសចាស់ៗចោលជាច្រើនពីតុធ្វើការរបស់ខ្ញុំ តែក្រដាស២សន្លឹកនេះខ្ញុំមិនអាចបោះបង់ចោលវាបានផ្ទុយទៅវិញខ្ញុំនៅតែរក្សាទុកពីរបីឆ្នាំហើយក្រដាស២សន្លឹកនេះអាចធ្វើខ្ញុំមានស្នាមញញឹមនឹងបន្តដំណើរទៅមុខដោយម៉ឺងម៉ាត់ដោយមិនខ្លាចនឿយហត់»។
តាមរយៈនេះ អ្នកលេងបណ្ដាញសង្គមហ្វេសប៊ុកមួយចំនួន បានលើកឡើងថា «ក្រដាសនេះជាភាពកក់ក្ដៅរបស់បង ក្រដាសនេះគឺជាកម្រងអនុស្សាវរីយ៍ដ៏កក់ក្ដៅដែលបងមិនអាចបោះវាចោល ខ្ញុំជឿថាបងក៏ចូលចិត្តរស់នៅជាមួយអនុស្សាវរីយ៍ដែល ខ្ញុំជឿថាអនុស្សារទាំងអស់ក៏ជាកម្លាំងចិត្តមួយផ្នែកដែលសម្រាប់បង»។
«កូនស្រលាញ់ប៉ាចឹងហើយ, ខ្ញុំគ្រាន់តែជាអ្នកអានក៏ខ្ញុំអួលដើមកដែរបង, បាទបងកុំបោះបង់គាត់អីបង, ក្រដាសវាចាស់មែន តែមានខ្លឹមសារនិងអត្តន័យចងចាំទុកមិនអាចភ្លេច, សរសេរសាច់រឿងហ្នឹង១បទទៅបង, គាត់អាយុប៉ុន្មានហើយបង ? សរសេរបានល្អ»។ ចំពោះសួរនេះ ត្រូវបានលោកយឹម តាស្រង់ ឆ្លើយថា កូនបងអាយុជាង១០ឆ្នាំ៕
