តាមព័ត៌មាន ដែលទទួលបាននាពេលកន្លងមក បានកត់សម្គាល់ឃើញថា តារាប្រុសស្រីខ្មែរចំនួន៣ដួង ដែលបានជិះរថយន្ត Rolls-Royce ដែលមានតម្លៃកប់ពពកនោះ រួមមានកំពូលតារាចម្រៀងឱក សុគន្ធកញ្ញា, លោកខេមរៈ សិរីមន្ត និងកញ្ញាទេព បូព្រឹក្ស។
កំពូលតារាចម្រៀងខេមរៈ សិរីមន្ត ត្រូវបាន លោកស្រី គួយ ផល្លី ជាភរិយាទិញឲ្យកាលពីពេលថ្មីៗកន្លងទៅនេះ ហើយលោកមានក្ដីរំភើបជាពន់ពេក ក៏បង្ហោះសារភ្ជាប់ជាមួយរូបភាពរថយន្តនោះថា «ភរិយាខ្ញុំសួរខ្ញុំថាហេតុអីបានបងចូលចិត្តជិះតែឡានធំៗខ្ពស់ៗចឹង តើបងចូលចិត្តឡានតូចអត់ ខ្ញុំថាមានអីចូលចិត្តតាសស្រាប់តែឡានមកដល់មុខផ្ទះតែម្តង»។
ចំពោះ កំពូលតារាចម្រៀង ឱក សុគន្ធកញ្ញា ក៏ត្រូវបានគេដឹងថា បច្ចុប្បន្នក៏មានរថយន្តទំនើបម៉ាក Rolls-R oyce នៅក្នុងដៃជិះយ៉ាងត្រជាក់ចិត្ត ផងដែរ។ ក្រៅពីរថយន្ត Rolls-Royce តារាស្រីរូបនេះ ក៏ប្រើប្រាស់រថយន្ដផ្សេងៗទៀតឆ្លាស់គ្នា ផងដែរ។
ចំណែក កញ្ញា ទេព បូព្រឹក្ស អតីតតារាចម្រៀងហង្សមាស ត្រូវបានម្ចាស់ស្នេហ៍ ងួន ចាន់ដេវីត ហៅG-Devithហុចកូនសោរថយន្តទំនើប Rolls-Royce Ghost ក្នុងថ្ងៃខួបចំណងស្នេហ៍គម្រប់៤ឆ្នាំរបស់ពួកគេ ធ្វើឲ្យនាងរំភើបរហូតយំខ្សឹបខ្សួល ហើយក៏ត្រូវបានសារព័ត៌មានក្នុងស្រុកមួយចំនួនចុះផ្សាយល្បីកក្រើកផងដែរ។
ដោយឡែក ពិធីការិនីដ៏ឆ្នើមអ្នកនាង ខៀវ សានសាណា បានធ្វើឱ្យមហាជនភ្ញាក់ផ្អើលផងដែរ បន្ទាប់ពីអ្នកនាង បានបង្ហាញរថយន្តទំនើបម៉ាក Rolls-Royce ដ៏ថ្មីសន្លាងមួយគ្រឿង តាមរយៈការបង្ហោះក្នុង Story ហ្វេសប៊ុកផ្លូវការរបស់ខ្លួន។
តាមរយៈរូបភាពនោះ គេឃើញរថយន្តរបស់ខៀវ សានសាណា មានបំពាក់ស្លាកលេខពិសេស ដោយដាក់ថា «កម្ពុជា K.SAN.01» ទៀតផង ជាហេតុធ្វើឲ្យអ្នកគាំទ្រជាច្រើនយល់ថា រថយន្តនេះ អ្នកនាងទើបតែទិញថ្មីៗ។
គួរបញ្ជាក់ថា អ្នកនាងខៀវ សានសាណា និងលោក Seraj Satton បានរៀបការជាមួយគ្នា កាលពីថ្ងៃទី៨ ខែតុលា ឆ្នាំ២០១៦ នៅសណ្ឋាគារឡឺរ៉ូយ៉ាល់ បន្ទាប់ពួកគេ បានស្គាល់គ្នា ស្វែងយល់ចិត្តគ្នា មិនក្រោមក្រោម៣ឆ្នាំជាងនោះទេ។
ក្រោយរៀបការពួកគេ កាន់តែមានសុភមង្គលទ្វេដង ហើយក្នុងថ្ងៃខួបអាពាហ៍ពិពាហ៍របស់ខ្លួនគម្រប់៤ឆ្នាំ កាលពីប៉ុន្មានខែមុននោះ ខៀវ សានសាណា បានបង្ហោះសារសរសើរស្វាមីខ្លួនថា «បួនឆ្នាំមុនយើងបានកាន់ដៃគ្នាក្នុងនាមជាប្តីប្រពន្ធ ប្រាំពីរឆ្នាំមុនអ្នកបានចូលគោរពសំពះឱពុកម្តាយខ្ញុំ ហើយថ្ងៃនេះអ្នកនៅតែអោយតម្លៃគ្រួសារខ្ញុំ ខ្ញុំសូមហៅអ្នកថាជាស្វាមីដ៏មានគុណធម៌ Happy our wedding anniversary. Thank u for everything. ស្រលាញ់អ្នកមិនស្តាយក្រោយ my dear husband»៕ សូមទស្សនារថយន្តរបស់ខៀវ សានសាណាខាងក្រោមនេះ ៖
