កាលពីពេលថ្មីៗកន្លងទៅនេះ ពិធីការិនីដ៏ល្បីឈ្មោះអ្នកនាង ស៊ឹម សូលិកា បានទិញរថយន្តថ្មីសន្លាងមួយគ្រឿងឲ្យកូនស្រីបណ្ដូលចិត្តរបស់ខ្លួន ជាហេតុធ្វើឲ្យគ្រួសារខ្លួន ដែលមានសមាជិក៣នាក់ មានឡាន៣គ្រឿងបាត់ទៅហើយ។
ជាមួយគ្នានេះ ដើម្បីជម្រះមន្ទិលមហាជនមួយចំនួនរឿងថាហេតុអ្វី បានជាគ្រួសារខ្លួន មានសមាជិកតែ៣នាក់ ហើយមានរថយន្តរហូតទៅដល់៣គ្រឿងនោះ, ពិធីការិនីរូបនេះ ក៏បានធ្វើការពន្យល់យ៉ាងច្បាស់ជុំវិញរឿងនេះផងដែរ។
ក្រៅពីនេះ អ្នកនាងស៊ឹម សូលិកា ក៏បានលើកយកភាពតស៊ូយ៉ាងលំបាកនៅពីក្រោយពីភាពជោគជ័យ របស់ខ្លួននាពេលបច្ចុប្បន្ន ដើម្បីលើកទឹកចិត្តអ្នកគាំទ្រឲ្យចេះតស៊ូក្នុងឆាតជីវីត ហើយតាមរយៈសំណេរដ៏វែងអន្លាយនោះ មានអ្នកខ្លះអានហើយហូរទឹកភ្នែកទៀតផង។
ស៊ឹម សូលិកា បានបង្ហោះរូបថតជាច្រើនសន្លឹក អមដោយសាររៀបរាប់ដូច្នេះថា ៖ «សួស្ដីថ្ងៃអាទិត្យ មានកូនតិច មានកូនច្រើន ឬក៏គ្មានកូនសោះ គឺមិនប្រាកដថាយើងមានក្ដីសុខណាស់ ឬ គ្មានក្ដីសុខនោះទេ។ តាមការសង្កេត កន្លងមករបស់ខ្ញុំផ្ទាល់ ខ្ញុំយល់ថា…ជីវិតគ្រួសារ ដែលមាន សុភមង្គល គឺចាំបាច់ត្រូវមាន សមត្ថភាព លទ្ធភាព ជីវភាព និងការទទួលខុសត្រូវផង។
(កូនច្រើន តែខ្វះខាត ក៏មិនស្រួលដែរ មួរម៉ៅពេញផ្ទះ )បើគ្រាន់តែមើលឃើញរូបភាពប៉ុន្មានសន្លឹក ដែលខ្ញុំផុស អ្នកអាចគិតថាងាយៗ ស្រួលៗ ហ៊ឺហា ក៏ប៉ុន្តែ នៅពីក្រោយភាពជោគជ័យទាំងនេះ គឺមិនមែនជាការងាយស្រួលនោះឡើយ។
ចូលគេងពេលអធ្រាត្រ ភ្ញាក់ពីដំណេកម៉ោងទៀបភ្លឺ ធ្វើការលើសម៉ោង លើសកម្លាំង ឆ្លៀតពេលទៅសាលារៀនសូត្របន្ថែមទៀត។បាយទឹកមិនទៀងទាត់ សម្រាកមិនគ្រប់គ្រាន់ យកជីវិតធ្វើដើមទុន ប្រឹងប្រែង តស៊ូ អត់ធ្មត់ ផ្ចិតផ្ចង់ ស្មោះត្រង់។
ប្រាក់ចំណូល ប្រាក់ចំណាយ (ចាំបាច់ & មិនចាំបាច់) ប្រាក់សន្សំ ម្នាក់ៗខំណាស់ ប្រឹងណាស់ ទម្រាំតែមានឱកាសបានរស់នៅ ប្រកបដោយជីវភាពល្អសមរម្យ មានសេចក្ដីសុខ សុភមង្គល។ (មិនមែនចេះសីល ចេះជប់នោះទេ) ជីវិតជាកូនកំព្រាឪពុកដូចគេឯងមួយចំនួនដែរ ខ្ញុំសូមចែករំលែកបទពិសោធដល់មិត្តទាំងអស់ ផ្ដល់កម្លាំងចិត្ត អោយចេះតស៊ូ រឹងមាំឡើង កុំអស់សង្ឃឹម កុំបោះបង់ការប្រឹងប្រែង កុំរំពឹងចាំសុំលុយអ្នកណាអោយសោះ ព្រោះថាយើងក៏ពិបាក គេក៏ពិបាកដែរ ហើយមនុស្សយើងមានភាពទទួលខុសត្រូវរៀងខ្លួន។
បើយើងលោភលន់ យើងសម្លឹងចង់បានទ្រព្យសម្បត្តិដូចអ្នកដទៃ តែយើងគ្មានលទ្ធភាពគ្រប់គ្រាន់ទេ នោះនឹងធ្វើអោយយើងក្លាយទៅជាមនុស្សច្រណែនគេ ខឹងគេ ស្អប់គេ ព្រោះតែមិនសមបំណងរបស់ខ្លួនឯងដែលភ្លើតភ្លើន។
មានសំនួរខ្លះ បានសួរខ្ញុំថា ហេតុអីនៅផ្ទះមានគ្នាតែបីនាក់ ជិះឡានបី? (ខ្ជះខ្ជាយឬ អួតម្ល៉េះ)ចម្លើយខ្ញុំឆ្លើយថា កូនរបស់ខ្ញុំត្រូវទៅរៀនមហាវិទ្យាល័យ ហើយធ្វើការងារបន្ថែមទៀត ចាំបាច់ត្រូវតែបើកឡានទៅខ្លួនឯង។ ប្ដីខ្ញុំត្រូវទៅធ្វើការងាររាជការ ហើយនិងការងាររកស៊ីផ្ទាល់ខ្លួន ត្រូវតែប្រើប្រាស់ឡានជាប្រចាំ។
រីឯរូបខ្ញុំផ្ទាល់ ក៏ត្រូវទៅធ្វើការងារជាប្រចាំដូចគ្នា (បុគ្គលិកទូរទស្សន៍ បាយ័ន និងការងារផ្សេងៗទៀត) ដែលពួកយើងត្រូវមានកិច្ចការផ្សេងៗគ្នា ជាចាំបាច់។ បើចង់អោយសុបិនរបស់អ្នកក្លាយជាការពិត កុំដេកយូរពេក។ នឹកដល់ពុកអាណិតដល់ម្ដាយណាស់»។
តាមរយៈសំណេរដ៏មានអត្ថន័យនេះ ធ្វើឲ្យអ្នកគាំទ្រសម្ដែងការគាំទ្រ លើកសរសើរ អបអរសាទរ និងលើកទឹកចិត្តអ្នកនាងស៊ឹម សូលិកា ដូច្នេះថា «សូមសរសើរ បងសម្លាញ់ ឥឡូវបងធ្វើបានហើយ, ខ្ញុំនេះកូន៣ដែរបង តស៊ូណាស់ទម្រាំឈរដល់សព្វថ្ងៃ ប្រឹងបន្តទៅមុខទៀត, បងអានហើយយុំហើយអូនអើយ, បងសូមសរសើរនូវទឹកចិត្តល្អ និងចំណេះដឹងរបស់ប្អូនស្រីដ៏កម្រនេះណាស់ (សម្មាទិដ្ឋិ)»៕
