បងប្អូនអ្នកស្នេហាកីឡាប្រដាល់ច្បាស់ជាដឹងហើយថាកីឡាករថៃ ហ្វុនលួង មិនទាន់ស្គាល់ពាក្យថាចាញ់នៅឡើយសម្រាប់ការប្រកួតរបស់រូបគេនៅក្នុងប្រទេសកម្ពុជា។
កីឡាកររូបនេះនឹងត្រូវវិលមកសង្វៀនប៉ុស្តិ៍បាយ័នសាជាថ្មីដោយត្រូវប្រកួតក្នុងប្រភេទទម្ងន់៦៣.៥គីឡូក្រាមហើយបើកគ្មានការប្រែប្រួលទេនោះដៃគូរបស់គេគឺកីឡាករ ផល សោភ័ណ្ឌ ដែលអាចចាត់ទុកបានថានេះជាការប្រកួតសងសឹក។
កីឡាករ ផល សោភ័ណ្ឌ ធ្លាប់ចាញ់ពិន្ទុ ហ្វុនលួង ចំនួនពីរដងរួចមកហើយហើយកីឡាករថៃរូបនេះធ្លាប់បានយកឈ្នះជើងខ្លាំងកម្ពុជាជាបន្តបន្ទាប់ដូចជា ឃីម ឌីម៉ា, ផាន់ គ្រាន់, ឡុង សំណាង, ឌុម កែវដានិងឡៅ ចិត្រា។
ដូចនេះ នេះជាជំនួបទីបីហើយរវាង ផល សោភ័ណ្ឌ និង ហ្វុនលួង។ តើ ផល សោភ័ណ្ឌ អាចសងសឹក ហ្វុនលួង បានដែរឬទេ។ ទោះបីជាយ៉ាងណាក៏ដោយ ការប្រកួតរវាងអ្នកទាំងពីរមិនទាន់ត្រូវបានគេដឹងច្បាស់ថាតើនឹងរៀបចំឡើងក្នុងកម្មវិធីមួយណាឬពេលណានោះទេ គ្រាន់តែដឹងថា ជំនួបនេះនឹងធ្វើឡើងក្នុងទូរទស្សន៍ប៉ុស្តិ៍បាយ័ន៕
