ប្រិយមិត្ត ដែលនិយមតាមដានខ្សែភាពយន្តភាគចិន ប្រាកដណាស់ពិតជាធ្លាប់ បានទស្សនារួចមកហើយនូវរឿងដ៏ពេញនិយមមានចំណងជើងថា «យុទ្ធិសិល្ប៍បងប្អូនទាំង ១០» ដែលផ្ទៃរឿងទាំងមូលពោរពេញដោយយុទ្ធសិល្ប៍ និងវគ្គសំណើចជាច្រើននោះ។
មកទល់ពេលនេះ ខ្សែភាពយន្តមួយខាងលើ នៅតែទទួលបានការគាំទ្រដដែល និង ត្រូវបានលើកយកមកចាក់ផ្សាយឡើងវិញតាមបណ្ដាញសង្គមនានា។ ខ្សែភាពយន្តរឿង «យុទ្ធិសិល្ប៍បងប្អូនទាំង ១០» គឺចូលរួមសម្ដែងសុទ្ធសឹងតែជាតារាល្បីៗ ដូចជាតារាសម្ដែង Frankie Lam, Kenix Kwok, Lai Lok Yi, Jack Wu, Adam Ip ជាដើម។
អ្វីដែលគួរឱ្យចាប់អារម្មណ៍ខ្លាំងជាងនេះទៅទៀតនោះគឺថា តួអង្គសំខាន់ ដែលត្រូវជាឪពុកម្ដាយក្មេងទាំង ១០ ក្នុងរឿង គឺលោក Frankie Lam និង នាង Kenix Kwok) តាមពិត នៅក្នុងជីវិតពិត ពួកគេក៏ជាប្ដីប្រពន្ធនឹងគ្នាផងដែរ។
តារាសម្ដែង Frankie Lam បានចាប់ផ្ដើមទាក់ទងគ្នានឹងតារាសម្ដែងស្រី Kenix Kwok តាំងពីអំឡុងឆ្នាំ ១៩៩៤ មកម្ល៉េះ។ ពួកគេទាំងពីរ ក៏បានសម្រេចចិត្តរៀបការនឹងគ្នានៅថ្ងៃទី ១០ ខែមីនា ឆ្នាំ ២០០៤ ក្រោយចំណាយពេលយល់ចិត្តថ្លើមគ្នាអស់រាប់ឆ្នាំមកនោះ។ មកដល់ថ្ងៃទី ១៤ ខែមករា ឆ្នាំ ២០១០ គូស្នេហ៍តារាសម្ដែងប្រចាំទូរទស្សន៍ TVB រូបនេះ ក៏បានទទួលបានចំណងដៃកូនស្រីដ៏ស្រស់សោភាម្នាក់។
បច្ចុប្បន្ន តារាសម្ដែង Frankie មានអាយុ ៥៣ ឆ្នាំហើយ ខណៈភរិយាលោក Kenix មានអាយុ ៥១ ឆ្នាំ។ ទោះបីជាវ័យកាន់តែច្រើនក៏ពិតមែន ប៉ុន្តែចាប់តាំងពីចាប់ដៃគ្នាកសាងគ្រួសារមក តារាគំរូទាំង ២ រូបនេះ មិនដែលមានបញ្ហារង្គោះរង្គើក្នុងជីវិតគ្រួសារឡើយ តែបែរជាកាន់តែបង្ហាញនៅភាពផ្អែមល្ហែម ពោរពេញដោយសុភមង្គលលើសដើម៕
