លោកខៀវ កាញ៉ារីទ្ធ រដ្ឋមន្ត្រីក្រសួងព័ត៌មាន នៅថ្ងៃទី១៨ ខែមីនា ឆ្នាំ២០២១នេះ បានចេញប្រកាសមួយ ដោយសម្រេចលុបអាជ្ញាប័ណ្ណ គេហទំព័ររបស់លោកផែង វណ្ណៈ ឈ្មោះ«www.phengvannaknews.com»។
យោងតាមប្រកាស របស់ក្រសួងព័ត៌មាន បានសម្រេច «ប្រការ១. លុបប្រកាសលេខ៣៣៦ ព.ម ប្រក ចុះថ្ងៃទី២៨ ខែកញ្ញា ឆ្នាំ២០១៨ របស់ក្រសួងព័ត៌មាន ដែលអនុញ្ញាតឲ្យលោកផែង វណ្ណៈ បើកដំណើរការអាជីវកម្មគេហទំព័រឈ្មោះ «www.phengvannaknews.com» ដោយម្ចាស់អាជ្ញាប័ណ្ណ បានជេរប្រមាថចំពោះព្រះសង្ឃ ធ្វើឲ្យប៉ះពាល់យ៉ាងធ្ងន់ធ្ងរលើវិស័យព្រះពុទ្ធសាសនា ដែលជាសាសនារបស់រដ្ឋ ដែលជាការបំពានយ៉ាងធ្ងន់ធ្ងរលើវិជ្ជាជីវៈ និងកិច្ចសន្យា ដែលសាមីខ្លួនបានតម្កល់ទុកនៅក្រសួងព័ត៌មាន»។
ការសម្រេចលុបអាជ្ញាប័ណ្ណរបស់លោក ផែង វណ្ណៈ បានធ្វើឡើង បន្ទាប់ពីបុគ្គលរូបនេះ បានឡាយវីដេអូតាមបណ្តាញសង្គមហ្វេសប៊ុក ជេរប្រមាថចំពោះព្រះតេជគុណ ពិន សែម រហូតដល់ប្រមាថអាយុជីវិត យ៉ាងដូច្នេះថា ៖ «បានចៅអធិការវត្តអប់រំបែបនេះ បានបុណ្យណាស់ តែបើវាយកូនខ្ញុំ ដឹងតែក្បាលដល់ដីហើយ សុខចិត្តជាប់គុក»។
គួរបញ្ជាក់ថា កាលពីថ្ងៃទី១៧ ខែមីនា ឆ្នាំ២០២១ សាលាគណខេត្តសៀមរាប បានចេញលិខិតមួយ ធ្វើការស្នើសុំឲ្យរាជរដ្ឋាភិបាលកម្ពុជា ថ្កោលទោសចំពោះបុគ្គលឈ្មោះផែង វណ្ណៈ ដែលបានប្រមាថសមាជិកថេរសភាសង្ឃខេត្ត និងមន្ត្រីរដ្ឋបាលខេត្តសៀមរាប។
នៅក្នុងលិខិត ចុះហត្ថលេខាដោយ ព្រះសុមង្គល សិលាចារ្យ អាភាករោ ជុំ គឹមឡេង ព្រះមេគណ ខេត្តសៀមរាប និងជាព្រះប្រធានក្រុមប្រឹក្សាកិច្ចការវត្តអារាម បានឲ្យដឹងថា កាលពីថ្ងៃទី១៤ មីនា នៅវត្តរាជបូណ៌ មានករណីថតជាវីដេអូនូវសកម្មភាពប្រៀនប្រដៅសិស្សគណរបស់ព្រះមហាវិមលធម្ម ដោយរំពាត់ផ្តៅ បានធ្វើឱ្យព័ត៌មាននេះដឹងដល់សាធារណជន ធ្វើឱ្យបញ្ហានេះត្រូវបានមន្ត្រីអាជ្ញាធរខេត្ត និងសាលាគណខេត្តសៀមរាប ស្រាវជ្រាវ ពិនិត្យទៅលើផ្លូវច្បាប់ និងទៅតាមធម៌វិន័យរបស់ព្រះពុទ្ធជាម្ចាស់ អាជ្ញាធរខេត្ត បានធ្វើការស្រាវជ្រាវសាកសួ រនូវហេតុការណ៍ផ្សេងៗ បានកំណត់នូវទង្វើរបស់ព្រះមហាវិមលធម្ម គឺមានគោលបំណងសុចរិត ធ្វើឡើងដោយគ្រាន់ តែជាការប្រៀនប្រដៅទៅតាមបទបញ្ញត្តិ នៃបទបញ្ជាផ្ទៃក្នុងវត្តតែប៉ុណ្ណោះ។
ចំណែកខាងសាលាគណខេត្ត បាននិមន្តបើកកិច្ចប្រជុំថេរសភាសង្ឃខេត្ត ហើយសម្រេចលើកទោសតាមវិន័យត្រូវអាប ត្តិ (បាចិត្តិយ) ចំពោះព្រះមហាវិមលធម្ម ព្រះគ្រូចៅអធិការវត្តរាជបូណ៌ និងបានសម្រេចសូមឱ្យព្រះគ្រូចៅអធិការវត្ត ធ្វើកិច្ចសន្យាបញ្ចប់រឿង។
សាលាគណខេត្តសៀមរាប បានបញ្ជាក់ថា «ប៉ុន្តែអ្វីដែលគួរឱ្យសោកស្តាយបំផុតគឺបុគ្គលឈ្មោះ ផែង វណ្ណៈ បាន Live តាមផេករបស់ខ្លួន បានលើកឡើងថា ប្រសិនបើវាយកូនខ្ញុំបែបនេះ ខ្ញុំអត់ទៅប្តឹងទេ ខ្ញុំទៅបាញ់ចោលតែម្តង ចំពោះអ្នក ប្រព្រឹត្ត និងចោទបន្ថែមនូវពាក្យមិនពិតដោយពោលថា លោកជាជនរងគ្រោះរត់គេចខ្លួន ព្រោះខ្លាចគេតាមធ្វើបាបមិន ហ៊ានចូលផ្ទះទៀតផង និងវាយប្រហារមន្ត្រីថេរសភាសង្ឃខេត្ត ដែលធ្វើឱ្យប៉ះពាល់ដល់កិត្តិយស សេចក្តីថ្លៃថ្នូរ ព្រះពុទ្ធសាសនាដែលជាសាសនារបស់រដ្ឋយ៉ាងខ្លាំង»។
លិខិតដដែល បន្ដថា «មិនត្រឹមតែប៉ុណ្ណោះ បុគ្គលរូបនេះ មានការជេរប្រមាថ មើលងាយដល់មន្ត្រីរាជការ អាជ្ញាធរ ខេត្តសៀមរាបយ៉ាងធ្ងន់ធ្ងរថែមទៀតផង ដោយពោលពាក្យថា ចង់យកព្នៅវាយក្បាលម្នាក់បីផ្ដៅទៀតផង»។
សាលាគណខេត្តសៀមរាប ក៏បានលើកឡើងថា ដោយឃើញទង្វើអសីលធម៌របស់បុគ្គល ផែង វណ្ណៈ បែបនេះ ព្រះមេគណតំណាងឲ្យព្រះសង្ឃទូទាំងខេត្តសៀមរាប សូមព្រះរាជានុញ្ញាតទ្រង់ព្រះមេត្តាប្រោសជួយ ស្នើសុំទៅរាជរដ្ឋាភិបាល មានចំណាត់ការថ្កោលទោស ចំពោះបុគ្គលឈ្មោះ ផែង វណ្ណៈ តាមច្បាប់ ឱ្យសមនឹងទង្វើដែលជននេះបានប្រព្រឹត្ត៕
